Vielha, 26 de juriòl de 2018.- Eth pròplèu dimenge 29 de juriòl se celèbre ua naua edicion dera Corsa d’Aran per sa Lengua, qu’enguan arribe ara XXVau edicion.
Era carrèra, organizada peth collectiu Lengua Viua, se celèbre des der an 1993 entà deféner era lengua e era identitat aranesa damb eth lèma deth Prèmi Nobel de Literatura Frederic Mistral, “Qui ten era lengua, ten era clau”.
Es corredors e caminaires tornaràn a gésser des de Montgarri, Tredòs, eth Pòrt de Vielha e Les, entà arribar ath torn des 20:15 ores ena plaça dera glèisa de Vielha.
Es participaires arribaràn en Vielha en tot cargar es terçons, que permeteràn diboishar eth mapa d’Aran ena plaça dera glèisa, e es bandères qu’era adornaràn. Pendent er acte, que compdarà damb era preséncia deth sindic d’Aran, Carlos Barrera, se liegerà eth manifèst deth collectiu Lengua Viua, e se liurarà eth prèmi Lengua Viua, creat entà laudar eth trabalh de persones, collectius o institucions en defensa der aranés. Tanben se liurarà eth prèmi ath dessenh dera samarreta qu’enguan deth 25au aniversari a estat realizada per Aleix Filloy Cavero.
Era hèsta d’Aran per sa Lengua finalizarà damb eth concèrt deth grop Nadau.
Venta de samarretes:
Dimèrcles 25 e dijaus 26 en Salardú, deuant dera oficina de torisme, de 19 a 21 ores.
En Bossòst, Plaça dera hònt, de 19 a 21 ores.
En Vielha, cada dia enes cobèrts der Ajuntament de Vielha de 19 a 21 ores.
Enguan tanben se pòden crompar casquetes e morralets.
ORARI DERA CORSA ARAN PER SA LENGUA
Gessuda liure entà passar eth pòrt de Vielha e amassada qui ac agen hèt en prat de Tishineret as 19h30.
- 12h00 Gessuda des de Les (en tot caminar)
- 12h00 Gessuda des de Montgarri (en tot caminar)
- 12h50 Parada en Bossòst, plaça dera glèisa
- 14h30 Gessuda des de Tredòs (en tot caminar)
- 15h00 Es Bòrdes, minjar toti amassa, cadun morralet pròpri
- 15h00 Unha, minjar toti amassa, cadun morralet pròpri
- 17h00 Gessuda d’Es Bòrdes
- 17h00 Gessuda d’Unha
- 17h00 Gessuda des de Montgarri (en tot córrer)
- 18h30 Gessuda d’Arties, plaça Urtau
- 20h15 Arribada ena plaça dera glèisa de Vielha. Parlaments. Liurament deth Prèmi Lengua Viua
- 20h30 Concèrt deth grop Nadau