Vielha, 17 d’octobre de 2017.- Des de deman dimèrcles e enquiath pròplèu 20 d’octobre era Val de Aran acuelh era quatau edicion deth Congrès d’Agents Forestaus e Mieiambientaus d’Espanha e deth sud d’Euròpa, ena glèisa dera nòsta Sra. de Mijaran, que s’a adaptat exprèssaments entara celebracion deth congrès organizat peth Conselh Generau d’Aran a trauès deth departament d’Agricultura, Ramaderia e Miei Naturau de Aran.
En congrès se debateràn entre d’auti, aspèctes religadi damb era seguretat des Agents Forestaus e Mieiambientaus o era prepausa de Lei basica estatau entà tot eth collectiu qu’actuauments se trabalhe en Congrès des Deputats. Pendent es dies deth congrès tanben auràn lòc diuèrses exibicions des unitats canines e demostracions de desparières accions damb era ajuda de dròns. Eth congrès acuelherà 550 Agents Forestaus e Mieiambientaus procedenti de totes es comunitats autonòmes e de Portugau, França, Andòrra e Itàlia, acompanhadi fòrça d’eri des sues familhes.
Aguesta ei ua bona oportunitat entà dar a conéisher tot çò qu’era Val d’Aran pòt aufrir as sòns visitaires, e ei per açò qu’era organizacion deth congrès a previst ua seria d’activitats religades damb era cultura, er auviatge, er òci e era aufèrta ludica de natura e gastronomica dera Val d’Aran entad aguesti acompanhaires.
Cau arrebrembar qu’era Val d’Aran a eth reconeishement de destinacion sostenible Biosphere autrejat per Global Sustainable Tourism Council dera ONU, a estat finalista enes Destination Leadership autrejadi pera National Geographic Society e era ITB de Berlin, ath delà dera distincion que li acredite coma Destinacion Toristica Intelligenta (DTI) ena edicion deth 2016 dera Hèira Internacionau deth Torisme- FITUR, autrejada pera Societat Estatau entara Gestion dera Innovacion e es Tecnologies Toristiques (SEGITTUR), e arreconeishuda coma destinacion innovadora en torisme familhau, qualificacions que permeten entara Val d’Aran auançar entà un nau modèl de desvolopament toristic basat enes principis dera sostenibilitat, era diuersitat culturau e era responsabilitat sociau, çò que contribuís a que sigue ua destinacion toristica basada en respècte entara sua cultura, eth miei ambient e era responsabilitat.
Era tardor ei un des melhors moments entà gaudir des païsatges de nauta montanha que conviuen damb er auviatge aranés. Ua cultura e ues tradicions pendent sègles. Cadun des 33 pòbles d’Aran a era sua glèisa, quauques d’eres autentics tresaurs arquitectònics, damb jòies dera pentura o conjunts escultòrics en sòn interior, un legat artistic de grana varietat e excepcionau riquesa.
Sense desbrembar era rica gastronomia aranesa, es foies, magrets e es confits d’anet, atau coma era tipica Òlha aranesa, es bolhs e patès son sonque ua petita mòstra dera codina dera Val d’Aran que se pòt degustar en aguestes dates. Ath delà, pendent es mesi de seteme e octobre entre ena sua plenitud era sason dera codina damb misharnons ena Val d’Aran, un producte cada viatge mès present enes recèptes des plats autoctòns.
Tot açò e fòrça mès demore as participaires e acompanhaires en 4au Congrès d’Agents Forestaus e Mieiambientaus d’Espanha e deth sud d’Euròpa aguesta setmana ena Val d’Aran.
Tota era informacion des activitats deth congrès la trobarà ací http://www.cafmavaldaran.com/