Acòrd entà finançar era consolidacion deth campanau dera glèsia de Gessa

Vielha, 24 d’abril de 2018.- Eth Conselh Generau d’Aran e era EMD de Gessa, damb era collaboracion dera Deputacion de Lhèida, an acordat era signatura d’un convèni de collaboracion entath finançament des òbres de consolidacion e accès ath campanau dera glèisa de Sant Pèir de Gessa.

Eth Conselh Generau d’Aran destinarà en aguesta accion sus er auviatge culturau aranés 34.500 € entà realizar es òbres de reabilitacion, que consistiràn enes arranjaments entara consolidacion e accès ath campanau dera glèisa. Era EMD de Gessa aportarà era madeisha quantitat.

Era glèisa de Sant Pèir de Gessa ei d’origen romanic. Date deth sègle XII, mès eth bastiment actuau ei deth XVII. Era base dera capèla ei deth sègle XII, maugrat que fòrça reformada.

Cride era atencion eth contrast deth sòn campanau hexagonau sus ua espessa e fòrta tor quarrada. Era tor deth campanau (deth sègle XVII), asilada ena banda èst, ei lheuada en maçoneria e es cantoades refortilhades damb pèira picada. Ena part superiora se daurisen ues dubertures rectangulars e de miei punt.

Er autar ei barròc e conserve un pè d’un aute mès ancian d’estil romanic. Era glèisa, tanben compde damb ua pica baptismau romanica e un magnific plafon pictoric deth sègle XVII, ath delà de tres capèles lateraus en cada costat, absis semiredon e campanau de tor quarrada. Era pòrta nòrd ei d’estil neoclassic.

Aguesta accion s’enquadre laguens es accions qu’amie a tèrme eth Conselh Generau d’Aran de recuperacion der auviatge culturau de la Val d’Aran en tot meter-lo en valor tanben coma atractiu toristic.

Comments are closed.