Actes damb motiu deth Dia Internacionau dera Eliminacion dera Violéncia contra es Hemnes ena Val d’Aran

Vielha, 20 de noveme de 2018.- Eth dimenge 25 de noveme se commemòre eth Dia Internacionau dera Eliminacion dera Violéncia contra es Hemnes e per aguest motiu des deth Conselh Generau d’Aran a trauès deth SIAH (Servici d’Informacion e Atencion as Hemnes) s’an organizat ua seria d’actes pendent aguest finau de noveme e principis de deseme.

Es actes previsti començaràn eth dimèrcles 21 de noveme damb ua vidèo conferéncia as 18.30 ores ena Sala de Premsa deth Conselh Generau d’Aran (3au Planta), damb eth títol de “Reflexions e estrategies entà ua intervencion socioeducativa dera prevencion dera violéncia de genre, non eterosexista e interseccional”, damb er objectiu d’aportar metodologies e estrategies entara intervencion socioeducativa e comunitària ena prevencion dera violéncia de genre des d’ua perspectiva non binaria de diuersitat sexuau e interseccional.

Eth dijaus 22 de noveme ena Bibliotèca Municipau de Vielha as 11.45 ores Teatre, musica e poesia contra era violéncia de genre e debat participatiu entà gojats e gojates de 3au d’ESO. Pera tarde as 19.00 ores dubèrt a tota era ciutadania se representaràn pèces de teatre contra era violéncia de genre, combinades damb moments musicaus (cançon e poesia) interpretades ath piano.

Eth diuendres 23 de noveme, aurà lòc era lectura deth Manifèst Institucionau contra era Violéncia de Genre, as 12.00 ores deuant dera sedença deth Conselh Generau d’Aran. Era lectura deth manifèst correrà a cargue dera vicesindica d’Aran Mª Angels Ordax.

Fin finau, eth deluns 17 de deseme de 08.00 a 15.00 ores aurà lòc ena sedença deth Conselh Generau d’Aran, ua session formativa dirigida a tot eth personau e cargues elegidi sus era perspectiva de genre e igualtat d’oportunitats. En aguest sens cau arrebrembar qu’institucions coma eth Conselh Generau e es ajuntaments an era obligacion d’implementar un Plan Intèrn d’Igualtat restacadi ath desvolopament dera Lei 17/2015 d’igualtat efectiva de hemnes e òmes, enes administracions, organismes publics e entitats privades. Er objectiu d’aguesta session formativa ei qu’es assistents agen coneishements sus sensibilizacion, conciliacion familhau e formacion sus er emplec de lenguatge non sexista, sètge laborau per arrason de sèxe e risqui laboraus damb perspectiva de genre, entre d’auti.

Cau arrebrembar que, pendent toti es deluns deth mes de noveme, eth SIAH organize un cors de coaching sus autocontròl emocionau, motivacion e autodefensa, damb er objectiu entre d’auti, de conéisher e practicar estrategies entà gestionar es emocions, potenciar er autocontròl e practicar tecnicianes de defensa personau de Hapkido, que permeten evitar es agressions e redusir ara auta part, sense atacar ne agredir. Eth cors a estat organizat peth Conselh Generau d’Aran e eth SIAH (Servici d’Informacion e Atencion as Hemnes), en collaboracion damb er Institut Català des Hemnes.

Eth cors ei daurit enquiath 3 de deseme en CDIAP, C/Pomaròla, 12 baishi de Vielha, de 16.00 a 20.00 ores. Entà mès informacion e formalizar es inscripcions, cau dirigir-se as Servicis Sociaus deth Conselh Generau d’Aran, C/Major, 36, en tot telefonar a eth +34 973 642 560 o per corrèu electronic a siah@aransalut.com.

Comments are closed.