- Deth 4 ath 7 d’octobre La Seu d’Urgell e Andorra acuelheràn ua naua edicion des Jòcs Specials Olympics, er eveniment esportiu mès important entà persones damb discapacitat intellectual que se celèbre cada 4 ans.
- Eth dijaus, dia 4 d’octobre, tàs 09h00 es nòsti esportistes aranesi d’ADDA s’anaràn tà Andorra damb eth desir de gaudir ath maximal d’aguest eveniment esportiu unic.
Des der an 2007 ADDA (Associacion de Discapacitats d’Aran) forme part d’ACELL (Federació Catalana d’Esports per a Disminuïts Psíquics) e toti es usatgèrs d’ADDA estan federadi. ACELL ei ua entitat sense ànim de lucre qu’a coma principau objectiu melhorar era qualitat de vida deth collectiu e fomentar era sua inclusion a trauès der espòrt e deth léser.
ACELL seguís era filosofia deth moviment internacionau SPECIAL OLYMPICS, qu’acuelh ath major numerò d’esportistes damb discapacitat intellectual de tot eth mon, a on er esportista ei çò de mès important e er espòrt ei er esturment entà transméter valors, en tot garantir qu’es esportistes gaudissen d’ua competicion digna, justa e equilibrada.
Des der an 2007 e coma part deth programa que s’aufrís as usatgèrs d’ADDA participen en 3 o 4 campionats territoriaus annaus enes modalitats de:
– Natacion: campionat que se celèbre en Mollerussa.
– Petanca: campionat que se celèbre en La Seu d’Urgell.
– Atletisme: campionat que se celèbre en Lleida.
– Fotbòl Sala: campionat que se celèbre en Mollerussa.
En 2012 ADDA participèc peth prumèr còp en uns SPECIALS OLYMPICS en Vilanova i la Geltrú (Barcelona). En aguesta escadença participèren 7 usatgèrs deth Centre Aucupacionau ADDA.
En 2014 ADDA participèc damb 8 esportistes enes Specials Olympics de Calella (Barcelona) ena categoria d’atletisme.
Eth 2017 participèren en Territòri Specials d’Andorra tanben en atletisme.
Aguest 2018 participaràn enes Jòcs Specials Olympics La Seu d’Urgell- Andorra deth 4 ath 7 d’octobre de 2018. En aguesta escadença, 8 esportistes d’ADDA participaràn ena categoria d’atletisme.
Aguest eveniment se celèbre cada 4 ans, enguan ac hè jos eth lèma: “ETH MELHOR EI QUI AC SAGE”, e compdarà damb era participacion de 1.500 esportistes, e ja son mès de 13 païsi qu’an confirmat era sua assisténcia. 1.239 esportistes son catalans, 93 der estat espanhòu e 54 d’Andorra, e 114 son esportistes de 13 delegacions diferentes, entre es quaus: Belgica, Finlàndia, Portugal e Alemanha.
Eth dijaus, dia 4 d’octobre, tàs 09h00 deth maitin gessen es nòsti esportistes aranesi d’ADDA damb destinacion Andorra damb eth desir de gaudir ath maximal d’aguest eveniment esportiu unic.
Aqueth madeish dijaus pera tarde se celebrarà era Hèsta Inaugurau en Andorra, ua gala que serà retransmesa en dirècte pera television tàs 20h00.
Eth diuendres 5 d’octobre se realizaràn es pròves de tempsi e eth dissabte serà era jornada de carrères e medalhes.
Eth dissabte dempús deth sopar, ADDA assistirà ena hèsta des esportistes, damb toti eri, ath delà des tecnics, volontaris e organizacion. E fin finau, eth dimenge, dempús d’assistir ara Clausura des Jòcs en La Seu d’Urgell, vieràn de nau cap a casa.
Ath delà dera competicion esportiua compdaràn damb fòrça activitats complementàries de léser e jòcs. S’organizaràn activitats de léser, damb caractèr ludic e recreatiu ath torn des installacions esportiues. S’organizarà era Hèira des Jòcs, coma un espaci damb activitats diuèrses de léser, culturaus e associatives, daurit ara poblacion en generau des dues sedences e as participants des jòcs.
Damb era collaboracion de Special Olympics España, compdaràn tanben damb eth Programa de Salut, a on es esportistes poderàn realizar diferentes revisions medicaus gratuïtes.
Vielha, 28 de seteme de 2018
Conselh Generau d’Aran: Núria Sanjuan
Hònt e fotos: ADDA