Era estacion d’esquí aranesa de Baqueira Beret acuelherà es dies 6 e 7 de hereuèr era 37au Marxa Beret e eth Campionat d’Euròpa d’Esquí Nordic.

Se demore era arribada e participacion d’entre 1.400 e 1.500 esportistes procedenti de tot eth mon.

Era Marxa Beret en tot èster ua marcha populara compde damb diferentes distàncies podent participar gent de quinsevolh nivèu.

Enquià aué dimècles, 3 de hereuèr, se pòden hèr es inscripcions per Internet en www.marxaberet.com.

    Gessuda dera Marxa Beret er an passat

Era Marxa Beret neishec er an 1977 coma ua marcha populara e enguan, includís era maraton d’estil classic e d’estil liure, puntuable entara Copa Catalana e entath Campionat d’Euròpa de Maratons d’Esquí. Egalaments, ei puntable entath Campionat d’Euròpa d’Esquí Nordic e era qualificacion des esportistes ei includida en calendari dera Federacion Internacionau d’Esquí de pròves populares e tanben en calendari Euroloppet (circuit europèu de marches de longa distància).

Se demore era participacion d’entre 1.400 e 1.500 esportistes, 40% provien de païsi nordics, d’Alemanha, Àustria o Itàlia.

Es inscripcions van a bon ritme (lèu de 600 inscriti) e dejà an confirmat era participacion hondistes coma Ioseba Rojo, dera equipa dera Reiau Federacion Espanhòla d’Espòrts d’Iuèrn (RFEDI), Diego Ruiz, Jesus Labanda, Martí Vigo e Ruben Caseny. Era organizacion tanben a soslinhat qu’entre es corredors d’elèit estrangèrs i an Rolf Aschenbrenner (AUSTRIA) e Weis Eric (LUXEMBORG).

Era Marxa Beret ei era pròva d’Esquí de hons populara en estil classic mès multitudinària d’Espanha.

Eth dijaus, 4 de hereuèr, s’inaugurarà era prumèra Hèira dera Nhèu e Espòrt “Nheuspòrt” en pabalhon esportiu de Salardú a on tanben se trobarà installada era “Casa d’Acuelhuda”, lòc emblematic entà realizar inscripcions de darrèra ora, recuelhuda de dorsaus, informacion as participaires,…

Eth diuendres, 5 de hereuèr, a compdar des 18:00 ores en pabalhon esportiu de Salardú aurà lòc er acte inaugurau dera 37au Marxa Beret e Campionat Europèu d’Esquí Nordic.

Eth dissabte 6 de hereuèr se realizarà era pròva en estil liure de dues distàncies de 15km ena zòna d’Orri e Beret e de 30 km ena zòna d’Orri e Beret.

Eth dimenge 7 de hereuèr se disputarà era pròva de longa distància en estil classic. Damb un circuit de 10km ena zòna de Beret e Orri; de 21km ena zòna de Beret, Orri e Montgarri e fin finau eth circuit de 42km, ena zòna de Beret, Orri, Montgarri e direccion Marimanha.

Aguesta pròva correspon ath Campionat d’Euròpa de Maratons d’Esquí e eth campion d’Euròpa serà qui artenhe eth còmput des dus melhors tempsi des dues pròves de longa distància: era pròva de 30km (dissabte) e de 42km (dimenge).

Er an que ven, aguest Campionat d’Euròpa se celebrarà en Vuokatti, Finlàndia.

Era Marxa Beret l’organize eth Conselh Generau d’Aran, Baqueira Beret e er Ajuntament de Naut Aran damb era collaboración dera Associacion Volentaris Val d’Aran e d’auti organismes, ath delà dera Reiau Federacion Espanhòla d’Espòrts d’Iuèrn (RFEDI) e era Federacion Catalana d’Espòrts d’Iuèrn (FCEH).

Vielha, 3 de hereuèr de 2016

Conselh Generau d’Aran: Núria Sanjuan