Arriben es Hèires deth Bestiar 2017 ena Val d’Aran

Vielha, 29 de seteme de 2017.- Des deth pròplèu 6 d’octobre e enquiath 28 deth madeish mes auràn lòc ena Val d’Aran es tradicionaus hèires deth bestiar enes poblacions de Les, Salardú, Vielha e Bossòst.

Era prumèra des hèires serà era de Les eth pròplèu diuendres 6 d’octobre damb era tradicionau hèira de shivaus, poneys, somèrs, mules e oelhes.

Londeman eth dissabte 7 d’octobre, serà eth torn dera hèira de Salardú, damb era celebracion deth XIV Concors Morfologic Comarcau d’eth “Shivau Pirenenc Catalan”. Era hèira includís entre d’autes activitats un concèrt de Alidé Sans, as 19:00 ores en pabalhon pòliesportiu.

Eth dimenge 8 d’octobre arribe era hèira de Vielha qu’includís eth XXXIau Concors de Bestial, damb eth esdejoar popular entàs 10:00 ores e eth liurament de prèmis entàs agricultors e pagesi participaires entàs 12.00 ores.

Fin finau, eth dissabte 28 d’octobre serà eth torn dera hèira de Bossòst, que començarà entàs 10:00 ores damb era dubertura der espaci firau. Pendent era hèira s’amiaràn a tèrme totes es activitats religades damb era 6au edicion d’“Era Mongetada”, plea de prepauses ludiques e gastronomiques religades damb aguest producte autoctòn dera Val d’Aran.

heirabestiar2017

Comments are closed.