Vielha, 13 de noveme de 2018.- Era estacion d’esquí Baqueira Beret e eth Conselh Generau d’Aran an renauit es sòns compromisi de collaboracion entara pròplèu sason 2018/19, en relacion as activitats des programes deth CETEI Val d’Aran (Centre de Tecnificacion d’Espòrts d’Iuèrn).

Concrètaments en çò que tanh ara subvencion des forfaits de sason dera Pre-Tecnificacion e Tecnificacion esportiua qu’arreceben es joeni esquiaires e es entrenadors des programes oficiaus, que son subvencionadi en grana part pera estacion d’esquí aranesa, atau coma enes facilitadi entara utilizacion des pistes d’entrenament.

Eth Centre de Tecnificacion Esportiua d’Espòrts d’Iuèrn dera Val d’Aran, restacat ara Reau Federacion Espanhòla d’Espòrts d’Iuèrn (RFEDI) e ara Federacion Catalana d’Espòrts d’Iuèrn (FCEH), a per objectiu ajudar ara progression de joenes promeses e velhar pera sua formacion integrau. Es esportistes seleccionadi arreceben formacion tecnica/esportiua e academica, ath delà d’un seguiment medicau/psicologic entà garantir un estat de salut adaptada entara practica esportiua e ua gessuda professionau de futur.

Eth Centre de Tecnificacion dera Val d’Aran damb un programa esportiu prepausat pes clubs aranesi, apòste pera formacion ena cèrca de naui talents entàs espòrts de nhèu.

Era sason passada 34 joenes esportistes integrèren es programes formatius de Pre-Tecnificacion deth CETEI Val d’Aran, 21 esportistes d’esquí aupin, 5 de Snowboard, 5 de freeride e 3 de frestyle.

Eth CETEI compde damb eth supòrt deth Conselh Generau d’Aran, era Deputacion de Lhèida, eth CSD (Consejo Superior de Deportes) e Baqueira Beret.