Vielha, 2 de noveme de 2018.- Eth Servici de Coesion Sociau deth Conselh Generau d’Aran realize es accions deth servici de prumèra acuelhuda entà persones estrangeres immigrants qu’includís er acompanhament, era formacion e era certificacion d’es coneishences minimes entà facilitar eth víuer e trabalhar ena Val d’Aran.

Es servicis que s’aufrissen se dividissen es tres moduls: un modul entà apréner aranés a trauès d’un cors introductori d’alfabetizacion de 15 ores, que servís de pònt entà qu’es persones se matriculen dempús as corsi oficiaus d’aranés deth Conselh Generau d’Aran, un modul sus coneishences laboraus, que desvolòpe eth SOC (Servici d’Aucupacion de Catalonha) ena Val d’Aran damb ua durada minima de 15 ores e un tresau modul sus coneishença dera societat aranesa damb un minim de 15 ores. Es persones qu’accedissen ad aguesti moduls an enquia dus ans entà completar tota era formacion.

Eth servici s’inície damb ua entrevista e er acompanhament ar usatgèr, qu’includís ua session de benvenguda, e era formacion enes tres moduls mencionadi.

Eth sistèma que desplegue eth servici de prumèra acuelhuda e era obtencion deth certificat de prumèra acuelhuda preve era convalidacion de coneishences e era formacion qu’es usatgèrs agen pogut obtier damb anterioritat.

Un grop de 20 persones nauvengudes en Aran s’a acuelhut enguan ad aguest servici de prumèra acuelhuda qu’ei cofinançat ath 50 per cent peth Hons Sociau Europèu dera Union Europèa.