Des deth passat 11 d’octobre es esportistes Astrid Fina, Vic González, Óscar González, Ibon Muguerza e Javier Jaen preparen en Itàlia era sason 2016/17
Es integrants des equipes B e de Deteccion e Seguiment de Snowboard deth CDIA (Centre Nacionau d’Espòrts d’Iuèrn Adaptat), se tròben concentradi des deth passat 11 d’octobre en Passo dello Stelvio (Itàlia) en tot premanir era sason de SBX 2016/17.
Eth motiu de realizar era concentracion ena estacion italiana arrespon ath hèt que dispòse d’un circuit de Snowbordercross que s’adapte as besonhs des nòsti riders, a declarat Albert Mallol, Seleccionador Nacionau de Snowboard deth CDIA.
Pendent es dies de concentracion es esportistes espanhòus coïncidissen ena preparacion damb es integrants dera equipa paralimpica italian entà coordinar es trabalhs e realizar amassa es entrenaments.
Astrid Fina (Equipa Nacionau B) e Vic González, Óscar González, Ibon Muguerza e Javier Jaen (Equipa de Deteccion e Seguiment) son es esportistes deth CDIA concentradi en Itàlia.
Es entrenaments son especifics de competicion entà poder profitar ath maximal eth circuit de SBX dera estacion italiana, en tot realizar trabalh dirigit mès es entrenaments generics ena pista.
“Trabalham fòrça era pista pr’amor qu’eth “rondo” deth circuit ei fòrça rapid, e compdam damb ua gessuda montada independenta deth madeish, era quau causa mos permet tanben entrenar a hons es gessudes” a hijut Mallol.
Era concentracion de 5+5 dies d’entrenament (11 eth totau), ei pura dera equipa Nacionau B deth CDIA, mès s’a volut dar era oportunitat d’anar as integrants dera equipa de Deteccion e Seguiment entà melhorar eth nivèu tecnic individuau e eth nivèu nacionau sustot de SBX, de cara as objectius mercadi entara sason, que coma dejà se prepausèc ena concentracion deth passat mes de seteme ena Val d’Aran, non son uns auti qu’obtier medalhes e culminar damb exit eth cicle que concludirà damb es Jòcs Paralimpics d’Iuèrn de Pyeongchang 2018.
Vielha, 24 d’octobre de 2016
Conselh Generau d’Aran: Núria Sanjuan
Hònt: CDIA