Acòrd de collaboracion deth Conselh Generau d’Aran damb era Universitat de Navarra

Vielha, 7 d’agost de 2018.- Eth passat dissabte dia 4 d’agost eth Conselh Generau d’Aran e era Facultat de Filosofia e Letres dera Universitat de Navarra acordèren collaborar damb er objectiu de fomentar amassa er estudi, era investigacion e era divulgacion der auviatge lingüistic, istoric, artistic, païsatgistic, identitari e culturau dera Val d’Aran.

Er acte auec lòc ena sedença deth Conselh Generau d’Aran, damb era participacion deth sindic d’Aran, Carlos Barrera e era Dra. Julia Pavón Benito, istoriana e directora deth Departament d’Istòria, Istòria der Art e Geografia, dera facultat de Filosofia e Letres dera Universitat de Navarra. Tanben participèc era professora d’Istòria der Art dera Universitat de Navarra, e veritabla impulsora dera collaboracion, Thaïs Rodés de Sarrablo, amassa damb Jèp de Montoya, assessor en tèmes culturaus e d’auviatge deth Conselh Generau d’Aran, e Elisa Ros, Tecnica d’auviatge deth Conselh Generau d’Aran.

Er acòrd preten impulsar era collaboracion entre desparièrs departaments dera Universitat de Navarra e eth Conselh Generau d’Aran entà identificar er auviatge lingüistic, istoric, artistic, païsatgistic, identitari e culturau dera Val d’Aran damb potenciau entà èster convertit en un recors orientat a fomentar era coneishença culturau ena zòna e definir projèctes concrèts d’investigacion atau coma era divulgacion des activitats previstes a desvolopar en aguest àmbit coma collòquis, conferéncies, taules redones, exposicions, publicacions, edicion e presentacion de libres e, en sòn cas, congressi e jornades.

Aguesta collaboracion s’includís laguens des trabalhs der expedient dera futura candidatura d’auviatge naturau, culturau, artistic e identitari dera Val d’Aran coma Auviatge dera Umanitat per part dera Unesco.

Era fòrça dera Val d’Aran laguens dera formula mixta d’auviatge naturau e culturau s’establís en conjunt creat per òme, pòbles, glèises, lengua, cultura, istòria e identitat, entornejat dera belesa de lòcs coma era Ribèra de Toran, de Canejan e eth Montlude; era Ribèra dera Artiga de Lin; era Ribèra de Varradòs; Beret e Montgarri; Aiguamòg e Valarties.

Fin finau, era delegacion dera Universitat de Navarra tanben visitèc era sedença der IEA- Academia aranesa dera lengua occitana, a on sigueren arrecebudi per Jusèp Loís Sans, president der IEA-AALO.

Comments are closed.