Vielha, 22 de deseme de 2017.- Eth Conselh Generau d’Aran e era Confederacion Idrografica der Ebre (CHE) an signat un convèni de collaboracion entà escambiar donades dera conca der arriu Garona.
Eth convèni signat peth sindic d’Aran, Carlos Barrera e peth president dera CHE, Raimundo Lafuente, aubedís ath besonh d’escambiar donades entre ambdues institucions a arraïtz dera experiéncia deth gran episòdi de inundacions deth mes de junh der an 2013 ena Val d’Aran.
Era experiéncia de 2013 metec en evidéncia eth besonh d’escambiar e completar es donades idrometeorologiques, generades peth conjunt des agents presents ena conca der arriu Garona, damb er objectiu de dar ua melhora responsa deuant episòdis extraordinaris de precipitacion o aumentacion de cabaus en cap dera conca.
Eth convèni aurà ua vigéncia de 4 ans, prorrogable per quate ans mès, periòde qu’a de perméter realizar es assagi, pròves o practiques damb ua vida utila pro ampla damb era fin qu’es resultats obtengudi siguen mès fiables e es assagi a long termini.
Ena implementacion deth convèni participe era enterpresa aranesa Arantec Enginnering, que harà possibla a nivèu tecnic er escambi bidireccionau des donades.
Arantec Enginnering, mejançant es estacions SmartyPlanet, ei era responsabla dera installacion, foncionament e manteniment des 15 estacions idrometeorologiques deth Conselh Generau d’Aran ena Val d’Aran e tanben trabalhe abituauments damb era Confederacion Idrografica der Ebre .
Gràcies ara naua tipologia des estacions, actuauments se pòt compdar damb mès quantitat de donades, sustot en conques petites e enes caps des arrius.
Es paramètres que se mesuren son eth nivèu des arrius, es cabaus, era intensitat dera ploja, era temperatura e era umiditat. Era foncion principau entà mesurar aguesti paramètres e era obtencion de donades, ei poder generar avisi e alèrtes en cas de perilh de inundacions.
Es estacions idrometeorologiques deth Conselh Generau d’Aran son plaçades en Aiguamòg, Aubèrt, Betren, Escunhau, Joeu, Les, Pont d’Arró, Pont de Vielha, Pont deth Lop, Salient, Toran, Tredòs, Unhola, Valarties e Varradòs.
Es estacions idrometriques dera CHE estan en Bossòst, Valarties e Arties, e es pluviometriques en Pla de Beret e Arties.
Pompièrs e Emergéncies d’Aran SL, qu’exercís es competéncies dera gestion des servicis d’emergéncies e proteccion civiu ena Val d’Aran, disposarà de totes es donades que seràn utilizadi entara planificacion des emergéncies, avisi as autoritats e ara poblacion, atau coma ena programacion e implantacion des recorsi operatius.
Era frequéncia d’aquesiment de donades serà cada 15 menutes pendent es 24 ores deth dia.
Foto: Smarty Planet