Vielha, 18 d’abril de 2018.- Er Institut d’Estudis Aranesi – Academia Aranesa dera Lengua Occitana, deth 3 ath 6 de junhsèga de 2018, hè un cors sus era correccion lingüistica en aranés, organizat damb era collaboracion deth Conselh Generau d’Aran e era Generalitat de Catalonha. Eth cors serà impartit per membres der IEA-AALO.
Entre eth dimars 3 de junhsèga e eth diuendres 6 a trauès d’aguest cors se prepause dar responsa a qüestions coma: Qué ei corrècte?, Coma se determine era correccion ena lengua?, A on documentar-se?, Quines referéncies auem?, O Quines tecniques se pòden utilizar? Quan parlam der aranés.
Es critèris de correccion, eth procès istoric e er estat de referéncia lingüistica en occitan e en aranés, eth còrpus textuau des darrèri 40 ans, es referéncies, gramaticaus, lexicaus, istoriques e documentaus des darrèri ans, era utilizacion des naues tecnologies, programes de còdi dubèrt e es estruments digitaus, seràn bèi uns des contenguts que s’abordaràn en aguest cors de 4 dies, en qué tanben i aurà sessions d’exercicis practics.
Eth diuendres 6 de junhsèga, se celebrarà ua taula redona jos eth títol de: “Era correccion lingüistica en catalan, en occitan estandard e en aranés”, ena que i intervieràn, Albert Turull, membre nomerari dera Seccion de Filologia der IEC (Institut d’Estudis Catalans); Jacme Taupiac, membre der IEA-AALO, e dera comission qu’elaborèc es Nòrmes ortografiques der aranés; Joan Salas-Lostau, president dera Seccion Estandard der IEA-AALO; e Jusèp Loís Sans, president der IEA-Academia Aranesa dera Lengua Occitana.
Eth cors aurà lòc ena sedença der IEA-AALO, ena Avenguda Garona, 17 de Vielha e Mijaran, en orari de tardes, a compdar des 18 ores. Eth prètz deth cors ei de 200 €, maugrat qu’es membres e collaboradors der IEA i poderàn assistir gratuïtaments. Ath delà, s’aufriràn 3 bèques entà poder i participar. Es places son limitades e ei imprescindible entath bon profitament deth cors un ordenador portatil entà seguir es explicacions e exercicis.
Trobaratz tota era informacion e era possibilitat d’inscriuer-vos en cors en: academiaaranesalenguaoccitana@gmail.com