Vielha, 6 de junh de 2018.- Eth CEI Val d’Aran organize ua capsula formatiua gratuïta adreçada a trabalhadors autonòms, trabalhadors per compde d’auti e trabalhadors en situacion de caumatge, entà apréner coma gerir es impòsti.
Eth cors a coma objectiu introdusir as trabalhadors ena gestion basica des impòsti, a trauès dera coneishença des obligacions fiscaus entà començar era activitat (nauta ena IAE). Es elements obligatòris dera factura. Libre de factures emetudes e arrecebudes. Obligacions fiscaus: concèptes prealables (hèt e base imposable, subjècte passiu e quòta der impòst) e IVA (coma elaborar es declaracions trimestraus e era declaracion annau). Er IRPF: calcular ingrèssi e despenses, realizar era declaracion annau e situacions especiaus.
Eth cors s’amiarà enes installacions deth CEI Val d’Aran, Plaça Naua, 1 de Casau, eth dimars 12 de junh e eth dimars 19 de junh, en sessions de tarde de 16:30 a 20:30 ores toti dus dies.
Es inscripcions se pòden realizar en tot trucar ath Telf. +34 973 64 18 01, per corrèu electronic en ceivaldaran@aran.org o peth ligam dera web deth Conselh Generau d’Aran www.aran.org
Era documentacion de besonh entara realizacion deth cors ei:
Autonòms:
-Còpia DNI o NIE
-Còpia deth rebut autonòm deth mes der inici deth cors.
-Un document damb eth numèro dera Seguretat Sociau: nomina, targeta, contracte, etc.
Trabalhadors:
-Còpia DNI o NIE
-Còpia dera nomina deth mes der inici deth cors.
– Un document damb eth numèro dera Seguretat Sociau: nomina, targeta, contracte, etc.
En situacion de caumatge:
- Còpia DNI o NIE.
Era capsula sus coma apréner a gerir es impòsti l’organizen eth Conselh Generau d’Aran, era Fondacion Coell e eth madeish CEI Val d’Aran, damb era collaboracion deth Consòrci entara Formacion Contunhe dera Generalitat de Catalonha e eth Ministerio de Empleo y Seguridad Social.