Vielha, 30 de novembre de 2017.- Eth passat 17 d’octobre entrèc eth foncionament era gestion des servicis de sanejament dera Val d’Aran qu’eth Conselh Generau d’Aran a adjudicat a DAM per un periòde de ueit ans, renovables per dus ans mès.

Era enterpresa DAM -Depuracion d’Aigües dera Mediterranèa- en UTE damb es enterpreses SAV – Agricultors dera Vega de Valéncia e ACSA Òbres e infrastructures s’a adjudicat es servicis d’explotacion, conservacion e mantenença des sistèmes de sanejament des localitats dera Val d’Aran.

Er an 2003 eth Conselh Generau d’Aran e era Agéncia Catalana der Aigua signèren un Convèni de Collaboracion entara gestion de diuèrses EDARs ena Val d’Aran, er objècte deth quau n’ei er establiment deth marc de collaboracion entre es entitats que intervien e era determinacion des condicions en qué s’amiarà a tèrme peth Conselh Generau d’Aran era execucion dera gestion, en tot correspóner ara explotacion des sistèmes de sanejament de Bossòst, Canejan (nòrd e sud), Les, Naut Aran (Bagergue) e Vielha e Mijaran (Escunhau). Ara longa d’aguesti ans s’an anat en tot incorporar d’autes estacions depuradores d’aigües residuaus (EDAR) ath sistèma: Naut Aran (Garòs), Vielha e Mijaran (Vielha), Aubèrt e Arròs.

Es EDARs, coma conjunt d’installacions entara depuracion des aigües residuaus generades pes nuclèus de poblacion dera Val d’Aran, son ua infrastructura basica entath territòri, entà dar responsa ath besonh de preservar un recors economic, naturau e sociau, en definitiva vitau, e ath madeish temps tan escàs e imprescindible coma ei er aigua, dera contaminacion generada pera activitat umana.

Se tracte donques de melhorar er estat ecologic des aigües, damb repercussions tant per proteccion deth miei ambient, entath desvolopament economic dera societat, era proteccion dera salut publica, atau coma entà preservar un des principaus valors deth territòri: er entorn coma hònt de riquesa dera Val d’Aran.

Entà tractar es aigües d’aguesti municipis se dispòse de dètz estacions depuradores d’aigües residuaus (EDARs). En conjunt, es dètz plantes pòden dar cobertura a 33.000 abitants equivalenti e tractar mès de 13.000m3/dia. Es sistèmes principaus son eth EDAR de Vielha, damb ua capacitat de tractament de 4.560 m3/dia, que da servici a 10.260 abitants equivalenti, e eth sistèma der EDAR Naut-Aran que pòt tractar un cabau mejan de 5.856m3/dia, damb capacitat entà dar servici ath delà de 13.000 abitants equivalenti.

Es accions programades pendent eth temps de concession enes EDARs se centraràn ena eficiéncia energetica des plantes. Era implementacion d’un hilat Smarty Planet de donades en temps reau, era substitucion d’equipes de gran consum, o era melhora d’equipes d’optimizacion que, pera sua antiquitat, ja non obtien boni rendiments, çò que se tradusirà en un considerable estauvi energetic.