Un totau de 23 establiments aranesi expausaràn es sòns productes ena hèira
Se realizaràn diferenti talhèrs e se realizarà ua tòia d’un lòt de productes
Eth Conselh Generatz d’Aran organize ua naua edicion dera hèira Aran Market, qu’aurà lòc en Vielha deth 22 ath 24 d’agost. Era hèira preten promòir es diferenti productes des comerçants dera Val d’Aran.
Un totau de 23 establiments treiràn en carrèr es sòns productes entà hèr conéisher era vasta varietat qu’aufrís eth comèrç aranés. En aguest sens, i aurà comerçants de ròba, alimentacion, souvenirs, complements, decoracion, atau coma era preséncia de diuèrsi mestieraus.
“Aran Market ei un eveniment que pòrte ja diuèrsi ans en marcha, e que cada an artenh atrèir era atencion de fòrça visitants. Atau, se poténcie eth comèrç aranés, damb era preséncia de visitants ath long des diferentes jornades que dure era hèira”, comente era conselhèra de Torisme, Comèrç e Consum d’Aran, Anna Díaz.
Pendent es tres dies dera hèira i aurà un totau de 30 estands a on se veneràn es productes. Ath delà, tanben se realizaràn diferenti talhèrs d’artesania e de texil amiadi a tèrme pes madeishi comerçants.
En finalizar era hèira se realizarà era tòia d’ua cistalha complèta damb diferenti productes des estands participants. Er orari d’Aran Market serà d’11h00 a 21h00 ininterrompudament.
Era inauguracion aurà lòc et pròplèu diuendres, dia 22 d’agost, entàs 11h00, en passèg de Vielha, dera man deth sindic d’Aran, Carlos Barrera, dera conselhèra de Torisme, Comèrç e Consum, Anna Díaz, e deth baile de Vielha e Mijaran, Àlex Moga.
TALHÈRS D’ARAN MARKET
Dissabte 23 d’agost:
• 11h30 a 13h00:
Talhèr de punt entà a adults a cargue de Talhèr textil de Bausen
• 17h30 a 19h00:
Guarnís eth tòn pròpi clauèr a cargue de Baobab artesanía
Talhèr de costura a cargue de Tricobebé
Dimenge 24 d’agost:
• 11h30 a 13h00:
Talhèr damb materiau reciclat a cargue de Dwayna artesania
• 17h30 a 19h00:
Talhèr de pastissaria a cargue de La Guinda
Talhèr damb hanga polimerica a cargue d’Alícia Mitjans