Vielha, 22 de març de 2018.- Entàs 09:45 ores d’aguest maitin es servicis d’emergéncies dera Val d’Aran an arrecebut er avís d’un laueg ena Val de Conangles, en zòna deth Lac Redon a 2.100m d’altitud, pròp dera boca sud deth tunèl de Vielha, qu’auie enterrat a tres persones que hègen trabalhs d’estudi e d’investigacion en dita zòna damb esquis de montanha.

Imatge d’archiu: Practiques en lauegi deth GRM Val d’Aran en Baqueira Beret

Dues persones an mòrt e ua tresau a resultat herida grèu damb politraumatismes ar èster atrapades peth laueg.

Es efectius que s’an desplaçat ath lòc des hèts an estat 13 efectius deth GRM Grop de Rescat de Montanha des Pompièrs d’Aran, 2 efectius deth Grop d’Accions Especiaus (GRAE) des Pompièrs dera Generalitat e 2 tecnics deth Centre de prediccion de lauegi deth Conselh Generau d’Aran. Tanben s’an desplaçat enquiara zòna es Mossos d’Esquadra damb era Unitat d’Intervencion en Montanha e eth Sistèma d’Emergéncies Medicaus (SEM) damb elicoptèr medicalizat, dues ambulàncies de Pompièrs e Emergéncies d’Aran e era equipa medicau deth SABS (Servici Aranés de Benéster e Salut), damb qui an collaborat 4 guides de montanha dera Val d’Aran, Habock helicoptèrs e eth personau der elipòrt dera Val d’Aran.

Juanmi Riu, Cap deth GRM de Pompièrs e Emergéncies d’Aran, expliquèc qu’an arrecebut er avís qu’un posible laueg auie enterrat a diuèrses persones per çò que s’a activat er operatiu de rescat. Es efectius an arribat entàs 10:10 ores ath lòc deth laueg e an començat era recèrca damb ARVA. An trigat 3 menutes en localizar ara prumèra victima, qu’ère semi-enterrada, conscienta, mès damb multiples fractures. A continuacion, s’an localizat as dues autes victimes que sofrien lesions incompatibles damb era vida. Es victimes an estat rapidaments localizades pr’amor qu’anauen equipades damb sistèma de deteccion ARVA.

Era persona herida grèu a estat evacuada ar elipòrt dera Val d’Aran a on a estat atenguda d’urgéncia e dempús trasladada en elicoptèr medicalizat entath Espitau de Bellvitge.

Dempús der operatiu de rescat, er accident se tròbe jos era investigacion judiciau des Mossos d’Esquadra.

Proteccion Civil a arrebrembat qu’eth perilh de lauegi ei mercat, 3 sus 5, en toti es sectors deth Naut Pirenèu e d’Aran.