Er aranés, Álex Puente Tasias, formarà part dera seleccion espanhòla absoluta d’esquí aupin

Eth joen aranés, Álex Puente (CAEI), a estat seleccionat entà integrar era equipa dera Federacion Espanhòla d’Espòrts d’Iuèrn entara sason 2015-16

alex puente_BB

Era Federacion Espanhòla d’Espòrts d’Iuèrn (RFEDI) a comunicat es esportistes qu’integraràn es diferentes seleccions absolutes entara sason 2015-16 a on er aranés, Álex Puente Tasias, deth Club Aranés d’Espòrts d’Iuèrn (CAEI) formarà part dera equipa absoluta d’esquí aupin.

Puente, olimpic en Sotxi’2014, e enquiara integrant dera equipa soïssa STEFFEN-S1, se proclamèc enguan en Baqueira Beret campion d’Espanha de gigant e subcampion d’eslalom e supergigant, e finalizèc 7au ena Universiada.

Maugrat auer hèt concurréncia en bèra pròva internacionau damb era seleccion, Álex Puente, peth prumèr còp formarà part dera seleccion espanhòla jos es ordes der austrian, Christian Leitner, tecnic damb ua grana experiéncia internacionau ena Copa deth Mon e ex entrenador de Finlàndia e Japon.

Eth vicesindic d’Aran e conselhèr d’Espòrts, Luís Carlos Medina, a manifestat “ei un orgulh veir coma Álex progresse ad aguesta velocitat e de ben segur que lo veiram enes posicions mès nautes des ranquings esportius. Manifestam tot eth nòste supòrt ath campion aranés d’esquí aupin e ambaishador dera destinacion Val d’Aran”.

Álex Puente Tasias, signèc un convèni damb eth Conselh Generau d’Aran entà per’mor de promòir era destinacion toristica e esportiua Val d’Aran peth mon representat ena imatge e enes valors der esquiador aranés.

Comments are closed.