Er aranés, Pòl Tellosa Badía, membre deth programa annau de Tecnificacion en Freeride deth Conselh Generau 4au en ELDORADO FREERIDE JUNIOR FJT1* Aramón Cerler

Abel Moga Carracedo finalize 7au encara afectat pera queiguda en Vallnord.

 

Pol Tellosa

 

Era dimenjada passada, 18 e 19 de hereuèr, es riders aranesi deth Club Esquí Emotion e membres deth programa annau de Tecnificacion en Freeride deth Conselh Generau d’Aran: Pòl Tellosa Badía, Abel Moga Carracedo e Axel Joaniquet se desplacèren tà Cerler entà disputar era tresau pròva dera classificacion nacionau: ELDORADO FREERIDE JUNIOR FJT1* Aramón Cerler.

Pòl Tellosa Badía, en ues condicions malaisides entà toti, se hège damb era 4au posicion, en tot tornar a èster enes prumèrs lòcs dera classificacion.

Pera sua part, Abel Moga Carracedo, arribèc enquiara setau posicion, fòrça meritòria, pr’amor que correc encara afectat pera queiguda en Vallnord, que fisicaments li passaue factura en ua baishada dura e tecnica.

Tant Pol coma Abel superèren es sues actuacions anteriores.

Axel Joaniquet non auec sòrt aguest còp maugrat esquiar ua bona linha, dus errors li portèren enquiara 16au posicion.

En paraules deth sòn entrenador, Cristian Boiria: “Era actuacion generau des riders a estat positiva, e en Cerler an obtengut es objectius mercadi, sustot es objectius mentaus e de concentracion e visualizacion des linhes, entà afrontar damb garanties era rèsta de pròves ena dusau mitat de sason”.

 

Pròplèus pròves

Abel Moga e Jordi Riba (ex tecnificacion deth programa) participaràn eth pròplèu 4 e 5 de març en Nendaz (Soïssa), ena pròva de tres estèles deth circuit internacionau qu’a de servir a Abel Moga entà afermar eth sòn classament deuant deth classament mondiau, e a Jordi entà calar-se en Top20 entara finau europèa de Vebier.

Era madeisha dimenjada, era rèsta dera equipa deth programa annau de Tecnificacion en Freeride deth Conselh Generau d’Aran, Pòl Tellosa e Axel Joaniquet participaràn ena pròva de Piau Engaly, a on afermaran eth sòn classament en circuit nacionau, e sajaràn trèir punts entà mantier tanben eth classament internacionau.

Eth 11 e 12 de març tota era equipa de Freeride de tecnificacion se desplaçarà tà Boí Taull entara finau deth circuit Nacionau “ElDorado” a on toti an opcions entà èster en un Top5.

Fin finau eth 1 e 2 d’abriu toti es gojats de Tecnificacion se desplaçaràn tà Verbier (Soïssa) entà disputar era pròva que barrarà era sason 2017.

 

Classament actuau en classament mondiau des gojats deth programa de tecnificacion en Freeride deth Conselh Generau d’Aran

Dempús des pròves mencionades, eth classament des gojats deth programa de tecnificacion en classament mondiau deth JFWTQ ei era següenta:

– 4au Abel Moga e 1èr espanhòu.

– 12au Axel Joaniquet e 2au espanhòu.

– 31au Pòl Tellosa e 5au espanhòu

 

Mès informacion:

 www.escuelaemotion.com

 

 

Vielha, 23 de hereuèr de 2017

 

Conselh Generau d’Aran: Núria Sanjuan

Hònt: CETEI Val d’Aran/Cristian Boiria/ Club Esquí Emotion

info@escuelaemotion.com

Comments are closed.