Er aranés, Tòn Cónsul, daurís era sason internacionau de patinatge sus gèu 2014 en ISU JGP Ljubljana

ton_isu

Eth patinador aranés, Tòn Cónsul, participarà ena que serà era sua prumèra competicion en circuit Gran Prix Junior. Aguesta competicion organizada pera Federacion Internacionau convòque a patinadors joeni d’entre 13 a 19 ans e supause era oportunitat de hèr concurréncia a un naut nivèu internacionau.

Eth joen patinador, que sonque compde damb 16 ans, debute aguesta dimenjada ena dusau cita dera ISU Junior Grand Prix de patinatge sus gèu 2014-15 que se celèbre ena ciutat eslovena de Ljubljana. Atau, Cónsul, serà er esportista que mès primairenc debutarà ena naua sason dera Federacion Espanhòla d’Espòrts de Gèu (FEDH), a on lutarà ath costat d’auti 22 patinadors entà arténher punts entà participar ena Finau dera ISU Junior Grand Prix que se disputarà deth 11 ath 14 de deseme en Barcelona.

Eth patinador aranés a entrenat e preparat es sòns programes pendent aguest ostiu ena localitat de Roana (Itàlia) ath costat des prestigioses entrenadores italianes, Franca Bianconi e Rosy Murante, e a compartit entrenaments damb patinadors de prumèr nivèu dera equipa italiana.

Tòn, comente qu’eth sòn objectiu entara sason serà afermar era sua confidança e experiéncia en competicions internacionaus, atau coma melhorar era sua tresau posicion en Campionat d’Espanha e superar es puntuacions artenhudes enes competicions internacionaus dera passada sason, era Lombardia Trophy e era Challenge Cup.

Aguesta designacion supause un rèpte entad esportista neishut en Vielha (Val d’Aran), que li calerà hèr concurréncia dues setmanes seguides enes pròves deth Junior Grand Prix de Ljubljana (Eslovènia) e Ostrava (Republica Chèca).

Cónsul, disputarà eth programa Cuert eth dijaus 28 d’agost a compdar des 19:00h ath temps qu’eth Long començarà entàs 18:15h deth diuendres 29. Aguesta competicion se poderà veir eth dirècte eth YouTube eth https://www.youtube.com/user/isujgp2011/videos.

Tòn, signèc enguan un convèni damb eth Conselh Generau d’Aran e Foment Torisme Val d’Aran entà promòir era destinacion toristica esportiua Val d’Aran peth mon, representada ena imatge e enes valors deth joen patinador, e dera equipa deth que hè part, mejançant eth patrocini institucionau.

Comments are closed.