Er incendi d’un camion de transpòrt de gas naturau talhe era N-230 en Les

Vielha, 12 de gèr de 2018.- Er incendi s’a produsit ath torn des 9:00 ores ara nautor dera rotonda d’entrada a Les, quan eth camion qu’ère estacionat des d’ager s’i a calat huec a causa d’ua pèrta de gas ena cistèrna. Er incendi s’a iniciat enes valvules deth camion e a afectat ara part exteriora jos era cabina e era mitat dera cistèrna.

Eth camion auie previst descargar eth gas naturau dera cistèrna en depòsit dera piscifactoria de Les.

Proteccion Civiu a activat eth Plan Transcat per incendi deth camion de gas naturau. S’a activat era sirena d’avís ara poblacion e a peticion der ajuntament s’a demanat eth confinament dera poblacion per risc quimic. Es alumnes dera escòla an estat trasladadi en ajuntament de Les.

En escandilhament an trabalhat dotacions de Pompièrs d’Aran des parcs de Les, Bossòst e Vielha, amassa damb es servicis d’emergéncies e de Mossos d’Esquadra.

Eth huec deth camion a estat extinguit, encara que mentre contunhe era pression e era pèrta de gas se mantierà activat eth Plan Transcat ara demora dera arribada d’especialistes de Bombers dera Generalitat de Catalonha.

Comments are closed.