Era 36au Marxa Beret da eth trèt de gessuda damb eth Sprint Criterium Vielha

Deman diuendres, 30 de gèr, comencen es actes dera 36au Marxa Beret damb eth 2au Sprint Criterium Vielha

• Eth dissabte, 31 de gèr, eth Plan de Beret acuelherà eth Campionat d’Espanha de Longa Distància, que compde damb mès de 200 inscriti

• Era 36au Marxa Beret, que se celebrarà eth dimenge, 1 de hereuèr, compde ja damb 1000 inscriti, damb participants de naut nivèu coma Ioseba Rojo e Laura Orgué

VOLENTARIS CHIPSVolentaris d’Aran metent es chips enes dorsaus dera Marxa

 

A compdar der an 1978, e ja son 36 edicions, era Marxa Beret ven en tot succedir-se e en tot mielhorar era qualitat deth traçat e servicis ath corredor. Est an passat participèren 1.300 fondistes en tot apropar-se ara mitica chifra de 1.752 qu’ei eth recòrd absolut d’inscripcions que s’artenhec hè un decènni. Enguan se demore superar era chifra deth 2014, donques que peth moment e, prèst de barrar es inscripcions a on-line, compde damb 1.000 inscriti, gràcies en bona part ar includiment dera Marxa en circuit FIS Euroloppet e era preséncia d’esquiadors centreeuropeus e escandinaus.

Aguesta edicion compde damb fondistes dera talha de Laura Orgué e Ioseba Rojo, dera equipa dera RFEDI. Tanben participen nombrosi corredors d’elèit escandinaus e centreeuropeus. Era Marxa Beret ei era pròva d’esquí de hons popular en estil classic mès multitudinària d’Espanha

2au Sprint Criterium Vielha

Eth diuendres entàs 18h00, en parcatge principau deth Conselh Generau d’Aran, s’amiarà a tèrme er espectacular 2au Sprint Criterium Vielha en quau s’afrontaràn ua seleccion de fondistes per parelhes. Eth guanhador s’afrontarà a un AUDI. SALOMON liurarà es prèmis as guanhadors.

Campionat d’Espanha de longa distància

Eth dissabte, eth Plan Beret acuelherà eth Campionat d’Espanha de longa distància, ua pròva en estil liure (Skating) qu’aurà dus recorreguts, un de 15 Km. e un aute de 31 Km. Era pròva ei laguens deth Calendari Oficiau dera RFEDI.

Era Marxa aufrís tres distàncies a escuélher

Era carrèra prepause 3 distàncies: 10, 21 e 42 km. que transcorren peth Plan de Beret a 1.850m d’altitud e que passen peth pòble de Montgarri. Aguesta edicion, era preparacion ei mès intensa encara a causa dera adaptacion dera competicion as exigéncies que compòrte era organizacion des Campionats d’Euròpa de Longa Distància donques qu’eth comitat organizador dera Marxa Beret a estat er escuelhut entara organizacion d’aguest eveniment entara sason 2015/2016.

Era Marxa Beret atrè a participants de naut nivèu coma es esquiadors dera Reau Federacion Espanhòla d’Espòrts d’Iuèrn (RFEDI) Laura Orgué e Ioseba Rojo (guanhador dera passada edicion). Destacar qu’Orgué, que tanben a guanhat ja en bèra ua escadença era Marxa Beret, hè concurréncia ena Copa deth Mon FIS e era passada sason demorèc 10au enes 30 km estil liure des JJOO de Sochi. Auti corredors destacadi seràn es tanben espanhòus Diego Ruiz, Sadurní Betriu, Jesus Labanda e Ruben Caseny. De Suècia Jens Ronnols, de Soïssa Frederic Grandjean, Melisa Couplan e Julie Branc. Era organizacion tanben a destacat qu’entre es corredors d’elèit presents i aurà participants de Finlàndia, Norvègia, Estònia e França.

Era Marxa Beret tanben atrè a grana quantitat de familhes e grops d’amics que participen de manèra populara.
Era Marxa Beret ei promoiguda peth Conselh Generau d’Aran, Baqueira Beret e er Ajuntament de Naut Aran damb era collaboracion dera Associacion Volentaris Val d’Aran e d’auti organismes, ath delà dera Reau Federacion Espanhòla d’Espòrts d’Iuèrn e era Federacion Catalana Espòrts d’Iuèrn.

PROGRAMA 36au MARXA BERET

Diuendres, 30 de gèr

11h00 Dubertura dera casa d’acuelhuda e burèu permanent (Pòliesportiu de Salardú)

18h00- 20h00 Exibicion d’esquí de hons e 2au Sprint Criterium Vielha (Parcatge deth Conselh Generau d’Aran. Passèg dera Libertat, 16. Vielha).

– Sèries eliminatòries (masculines/femenines) damb prèmis SALOMON.
– Competicion AUDI: Eth guanhador de cada sèria, s’afrontarà a un AUDI.
– Ceremònia e despartiment de prèmis

20h30 Concèrt Star3 e Dj Loop Navarro (Pòliesportiu de Vielha)

21h00 Barrament dera casa d’acuelhuda (Pòliesportiu Salardú)

Dissabte, 31 de gèr

10h00 Dubertura dera casa d’acuelhuda e burèu tecnic (Pòliesportiu Salardú)

10h30 Dubertura recinte de gessuda Campionat d’Espanha de longa distància (Beret)

11h00 Gessuda Campionat d’Espanha de Longa distància (Beret)

19h00 Presentacion 36au MARXA BERET (ena casa d’acuelhuda-Pòliesportiu Salardú)

19h30 Liurament de prèmis Campionat d’Espanha de longa distància (ena casa d’acuelhuda-Pòliesportiu Salardú)

20h00 Reünion tecnica, ena sala d’acuelhuda (Pòliesportiu Salardú)

21h00 Barrament dera Casa d’acuelhuda (Pòliesportiu Salardú)

Dimenge, 1 de hereuèr

09h00 Dubertura recinte de gessuda (en Beret)

10h00 GESSUDA 36au MARXA BERET

13h00 Liurament de prèmis dera 36au Marxa Beret (ath costat de zòna de Mèta en Beret)

14h30 Barrament de circuit

Comments are closed.