Era hondista aranesa Marta Céster (FCEH) s’imposèc enes Campionats d’Espanha, ena modalitat de skating, ena distància de 10 km. Era tanben aranesa, Lydia Iglesias, finalizèc dusau.

Pera sua part, era joena aranesa María Iglesias guanhadora ena categoria U18.

Ath delà, Marta Céster amassa damb Sergi Brau e Jaume Pueyo, campions d’Espanha de relèus en Candanchú. Eth tresau lòc siguec entara equipa formada per Lydia Iglesias, Cesc Colell e Gral Sellés.

                                   Es hondistes araneses Marta Céster e Lydia Iglesias en çò mès naut deth pòdium, 1èr e 2au lòc respectivaments.

Eth circuit de hons dera estacion aragonesa de Candanchú alberguèc dissabte passat, 25 de març, es nacionaus valedors tanben entara Copa d’Espanha Loteries. Ena competicion participèren 165 inscriti que realizèren era pròva de skating liura individuau en un dur traçat plaçat jos era majestuosa “Zapatilla” que presidís aguest mitic centre iuernau.

Es hemnes sènior recorreren ua distància de 10 km a on era representanta dera Federacion Catalana (FCEH), era aranesa Marta Céster, invertic 27:31:20 seguida dera esportista RFEDI e tanben aranesa e representanta dera FCEH Lydia Iglesias damb 27:52:51 e era tresau sènior siguec era basca Maialen López damb 29:07:27. Ena U18 era guanhadora siguec era joena aranesa, Maria Iglesias, tanben dera FCEH, damb 28:25:36.

En òmes, eth melhor temps siguec entath tolosan, Imanol Rojo, dera RFEDI e era federacion basca (FVDI) que corbic es 15 km masculins damb 34:19:44.

Eth dimenge 25 se disputèc era competicion de Relèus. Es categories Master, Sènior, U20 e U18 òmes e dames competiren en absoluts mixtes en 3x5km (15km) damb eth 1èr òme en classic, era dusau dama en liure e eth 3au òme en liure. En acabar era carrèra se disputèc era competicion des categories infantiles U16, U14 e U12.

Ena categoria absoluta, eth melhor temps siguec entara prumèra equipa dera Federacion Catalana d’Espòrts d’Iuèrn (FCEH), damb era aranesa Marta Céster, Sergi Brau e Jaume Pueyo, damb un temps de 37:36.19. Eth tresau lòc siguec entara equipa formada pera aranesa Lydia Iglesias, Cesc Colell e Gral Sellés, damb un temps de 38:36.14.

Vielha, 28 de març de 2018

Conselh Generau d’Aran: Núria Sanjuan

Hònt e Fotos: RFEDI