Era Modificacion des Nòrmes subsidiàries de regulacion de bòrdes e cabanes passe eth tramit ambientau prealable ara tramitacion urbanistica

Era Comission tanben s’a mostrat favorabla ara abilitacion de 5 naues pistes d’esquí aupin ena zòna de Pla de Beret

Vielha, 17 de hereuèr de 2017.- Era Comission Territoriau d’Urbanisme dera Val d’Aran, presidida peth director generau d’Organizacion deth Territòri e Urbanisme, Agustí Serra, amassada aguest maitin ena sedença deth Conselh Generau d’Aran a acordat adméter er informe d’avaloracion ambientau entara Modificacion des Nòrmes subsidiàries deth planejament en relacion damb era regulacion des bòrdes e cabanes en solèr non urbanizable dera Val d’Aran, coma pas prealable ara tramitacion urbanistica per part dera Comission d’Urbanisme, qu’abaste toti es municipis a excepcion de Vielha per fauta de documentacion que serà aportada ena pròplèu reünion dera Comission d’Urbanisme.

DSC_0972

Ena reünion d’aué dera Comission d’Urbanisme, tanben s’a tractat eth Plan d’organizacion urbanistica deth municipi de Vilamòs, que preve eth creishement en dus àmbits en cada extrèm deth nuclèu urban entà emplecs residenciaus e otelèrs.

En aguest sens eth sindic d’Aran, Carlos Barrera, a destacat e avalorat er esfòrç d’un municipi petit coma ei eth de Vilamòs entà ordenar urbanisticament eth municipi, a trauès d’aguest Plan d’organizacion urbanistica municipau (POUM).

Era Comission d’Urbanisme tanben a aprovat era ampliacion de cinc naues pistes d’esquí aupin ena estacion de Baqueira Beret, ena zòna de Pla de Beret. Aguesti cinc naui quilomètres esquiables se preve qu’era sason 2017-18 ja siguen en foncionament. Era longitud des pistes qu’a sometut era estacion oscillen entre es 650 mètres era mès cuerta e 1,3 quilomètres era mès longa.

Ara fin, tanben s’a aprovat Plan de melhora urbana d’organizacion volumètrica en nuclèu d’Escunhau. Eth sindic d’Aran, destaquèc qu’aguest Plan de melhora urbana signifique ua melhora importanta dera transformacion dera visuau d’Escunhau, que meterà en valor tot eth conjunt deth pòble.

IMG_3091

Comments are closed.