- Era equipa de Salva Maldonado se tròbe des deth passat 28 d’agost ena Val d’Aran en tot realizar er stage de pretemporada.
- Era plantilha e eth còs tecnic an estat arrecebudi pera conselhèra de Torisme e Desvolopament Economic d’Aran, Anna Díaz.
Eth Movistar Estudiantes, equipa dera Liga ACB de basquet, ei concentrat ena Val d’Aran en tot realizar un stage de preparacion entara pròplèu sason 2016-17 que començarà eth mes d’octobre. Tant era plantilha coma eth còs tecnic an estat arrecebudi ena sedença deth Conselh Generau d’Aran pera conselhèra de Torisme e Desvolopament Economic d’Aran, Anna Díaz.
Era equipa realize entrenaments maitiaus e vespertins en Palai d’Espòrts de Vielha (gimnàs, peses, carrèra,…).
Segons a explicat eth tecnic deth Movistar Estudiantes, Salva Maldonado, “er objectiu der stage ei hèr equipa, en tot fomentar era conviuéncia pr’amor que practicaments era equipa ei naua”.
Maldonado tanben a volut arregraïr en nòm dera equipa era acuelhuda qu’an agut e a soslinhat es installacions de prumèr nivèu que dispause era Val d’Aran.
Pera sua part, era conselhèra Anna Díaz, a arregraït qu’agen escuelhut era Val d’Aran entà realizar eth sòn stage e les a desirat fòrça exits entad aguesta pròplèu sason.
Eth Movistar Estudiantes realizarà eth sòn prumèr amistós contra eth CAI Zaragoza eth diuendres, 2 de seteme, entàs 20:15 ores en Balaguer.
Vielha, 31 d’agost de 2016
Conselh Generau d’Aran: Núria Sanjuan