Era Deputacion de Lhèida apròve era dusau fase deth projècte dera carretèra de Vilamòs e Arres

Vielha, 6 de hereuèr de 2018.- Era Comission de Servicis Tecnics dera Deputacion de Lhèida aprovèc aguest deluns era dusau fase deth projècte entara melhora d’un tram de quasi 3 kms dera carretèra LV-5055 d’accès as pòbles de Vilamòs e Arres. Era accion consistirà ena melhora, condicionament, aishamplament e arranjament deth tram que va deth PK 2+840 enquiath PK 5+605, que compdarà damb ua inversion de 1.828.343,19€.

Era Deputacion a aprovat eth projècte constructiu ath que li calerà seguir era licitacion des òbres entà poder establir es terminis finaus des trabalhs ena carretèra LV-5055.

Eth sindic d’Aran, Carlos Barrera, a manifestat que “aguesta dusau fase des òbres de melhora ena carretèra de Vilamòs e Arres permeterà qu’es vesins, tant d’Arres coma de Vilamòs, melhoren de forma substanciau era sua seguretat viau enes sòns trajèctes jornalièrs tath trabalh”. Barrera a arrebrembat que “aguesta dusau fase amassa damb era accion que s’amièc a tèrme er an 2014 ei ua des prioritats deth Govèrn d’Aran, acordada damb era Deputacion de Lhèida, titulara d’aguesta via, donques projèctes d’aguesta magnitud melhoren era vida des vesins d’Aran e cohesionen eth territòri”.

Er an 2014 era Deputacion de Lhèida en collaboracion damb eth Conselh Generau d’Aran executèc es òbres dera prumèra fase deth projècte constructiu de condicionament, aishamplament e melhora dera carretèra LV-5055, dera N-230 en Vilamòs, PK 0+00 enquiath PK 1+200, tram: Pònt d’Arròs, per un impòrt de 767.638,53€.

Comments are closed.