Enquiath 3 de gèr deth 2015, era glèisa de Sant Joan d’Arties acuelherà era exposicion d’Anna Llimós, “Humaraus. Emprentes der abitat”
Des der an 2007 ath 2011, Anna Llimós, estúdie Bères Arts ena Universitat de Barcelona e posterioraments corse eth Master en Formacion deth Professorat ena especialitat de Diboish.
Er an 2013 obten ua bèca gràcies as ajudes “Jove Creació d’Arts Plàstiques” qu’aufrís era Fundació Felícia Fuster e tanben er accèssit ena 10au edicion deth “Premi Climent Muncunill i Roca”. Er an 2014 er Ajuntament de Sabadell li concedís ua residéncia artistica ena Nau Estruch laguens dera convocatòria Sabadell Obert, destinada a artistes visuaus locaus.
Actuauments, Anna Llimós, complemente era produccion artistica damb es estudis de Master en Umanitats:art, literatura e cultura contemporanèes ena Universitat Oberta de Catalunya.
Era vinculacion damb era Val d’Aran erea admiracion pera sua arquitectura tradicionau la pòrte a desvolopar eth projècte: Humaraus. Emprentes der abitar.
En aguesta exposicion, centre eth sòn uelh enes humaraus des cases araneses e tracte era manèra coma se tornen, damb es ans, en un archiu istoric que recuelh es diferenti moments pes qué a passat era familha que i viu. Es objèctes qu’auien format part dera vida vidanta – cagires, armaris, tocadors, litères…- les trapam aué desbrembadi en cornèrs a on pòc a pòc se honen damb er entorn, despareishent per moments.
Dempús de fotografiar diferenti humaraus, trebalhe digitauments es estampes deishant en blanc er espaci qu’auien ocupat es objèctes. Posterioraments imprimís damb tecnica glicée e interven en cada ua des estampes damb grafit, representant graficament er espaci a on se trobaue er objècte en quauqui punts e, en d’auti, deishant en blanc fragments a on aurie d’aparéisher.
En paraules de Jèp de Montoya, cap de Cultura e Patrimòni d’Aran “Anna Llimós, ena sua joenessa, mos trasllade as moments deth Renaishement en tot plasmar eth sòn umanisme e coneishement enes camps der art, dera literatura, deth diboish e des naues tecnologies”