• Era recuelhuda selectiva ena Val d’Aran de gèr a agost deth 2015 respècte as madeishi mèsi deth 2014 a aumentat un 34,86%
Eth conselhèr de Territòri d’Aran, Jose A. Boya, amassa damb er assessor tecnic deth Conselh Generau d’Aran en matèria de recuelhuda de residus ena Val d’Aran, Josep Ma. Insausti, an presentat es resultats dera recuelhuda selectiva des 8 prumèrs mèsi deth 2015 (de gèr a agost, ambdús includidi).
Eth conselhèr, Jose A. Boya, a afirmat “es resultats artenhudi enquiara son fòrça boni e açò ei gràcies ara implicacion de toti es vesins d’Aran, pr’amor qu’era responsabilitat des dèishes ei de qui les produsís. Un país coma eth nòste a de dar responsa e solucions ara gestion des residus.”
Pendent er an 2014 eth Govèrn aranés realizèc reünions ara fin d’informar der ampliament deth servici, es naues ubicacions des isles de contienedors de veire, papèr, envasi, organica e, se facilitèc a toti ferrats e bosses especifiques entara separacion dera fraccion organica, atau coma imans damb explicacion deth contengut de cadua des fraccions damb es informacions qu’era Agéncia de Residus de Catalonha a a disposicion des usatgèrs ena sua web.
Tot eth materiau, atau coma es iglós que mancauen entà acabar es isles de contienedors, signifiquèren un esfòrç economic entath govèrn aranés de mès de 50.000€.
Comparatiua dera recuelhuda selectiva:
AN 2014 AN 2015 INCREMENT
– Organica: 37.520Kg 83.400Kg 122,28%
– Envasi: 92.780Kg 128.180Kg 38,15%
– Papèr/carton: 198.301Kg 312.080Kg 57,38%
– Veire: 339.300Kg 377.040Kg 11,12%
– Rèste: 3.615.220Kg 3.649.900Kg 0,96%
TOTAL SELECTIVA: 667.901Kg 900.700Kg 34,86%