Era rider deth CDIA torne a demostrar era sua progression en tot plantar cara ara subcampiona deth mon, era olandesa Lisa Bunschoten, qui acabèc en tot guanhar er aur per pòca diferéncia

Vielha, 16 de hereuèr de 2017.- Era Copa deth Mon IPC 2017 de Para-Snowboard que se dispute ena estacion dera Molina, a començat de manèra brilhanta entara rider deth CDIA Astrid Fina, qu’a estat dusau ena categoria SBLL2.

“Sò fòrça contenta peth resultat qu’è obtengut. Era darrèra setmana, enes mondiaus de Big White, en Canadà, fení luenh des prumères posicions e ena Molina è estat fòrça apròp d’arténher era victòria. Açò demòstre eth bon trabalh que realizi damb Albert Mallol, en tot melhorar fòrça e es sensacions son fòrça bones, ja pensi ena finau dera Copa deth Mon en Corèa deth Sud e ja tocarà pensar en es Jòcs Paralimpics de Pyeongchang.”

Astrid arribèc ara finau pera via rapida dempús dera sua grana accion enes dues baishades dera ronda classificatòria, en tot èster 2au damb un temps de 54.49, temps que melhorèc ena següenta carrèra entà èster 1èra damb 52.99. Ena finau dera pròva de boardercross ena categoria Lower Limb 2 (discapacitacion sense cames) se mesuraue a ua rivau que semblaue impossible hè uns mesi.

Ena prumèra jornada ua caiguda li privèc der aur, e en aguesta ocasion era olandesa gessec e s’escapèc, sense qu’era espanhòla podesse dar-li caça.

Eth diuendres e dissabte, ena pròva de banked slalom, Astrid Fina aurà ua naua oportunitat.

Vic González heregue era medalha de bronze

Víctor Manuel González, hereguèc era medalha de bronze ena categoria LowerLimb 1 Imp. 1 (esportistes damb amputacions femoraus, lesions medulars e de dobla tibiau). Dempús d’èster 4au (54.99) e 3au (55.13) enes dues baishades de classficiacion, vencec en quataus de finau ar austriac Reinhold Schett, mès ena luta peth bronze non podec damb er olandés Chris Vos.

Óscar González, que tanben concor ena madeisha categoria e que siguec 7au ena Copa deth Mon non podec passar de quataus.

Era Copa deth Mon IPC 2017 de Para-Snowboard se disputarà enquiath dissabte 18 de hereuèr ena estacion dera Molina e i a 13 païsi participaires.

Hònt CDIA

La Molina F4photagence.com – Oriol Molas.