Era Val d’Aran acuelherà ua arribada e ua gessuda d’etapa dera “Volta” Ciclista a Catalunya 2018

Vielha, 15 de deseme de 2017.- Era Val d’Aran viuerà dues etapes dera 98au edicion dera “Volta” Ciclista a Catalunya 2018. Se tracte dera arribada dera cincau etapa e dera gessuda, londeman, dera siesau etapa.

Era 98au edicion de la “Volta” se disputarà deth 19 ath 25 de març de 2018. Er inici dera pròva serà de nau en Calella eth dia 19 de març e concludirà enes carrèrs de Barcelona eth dia 25 de març.

Era “Volta” ei part deth Calendari UCI World Tour, qu’acorròpe es corses de maximal nivèu deth ciclisme en rota de carretèra, damb era participacion des 18 equipes UCI World Tour (Maximala Division deth Ciclisme internacionau) e 7 Continentaus.

Era relacion dera “Volta” Ciclista a Catalunya damb era Val d’Aran ven de luenh. Se remonte ath 9 de mai der an 1940 quan se disputèc era etapa Lhèida-Vielha que guanhèc eth ciclista de Luxemborg, Christophe Didier. Londeman, coma succedirà en 2018, era etapa auec era gessuda en Vielha e era arribada ena Sèu d’Urgèl, damb era victòria deth corredor bèlga Louis Van Espenhout. Enquia onze còps era Volta a agut coma protagonista era Val d’Aran. Eth darrèr viatge, er an 1993 damb era etapa contra relòtge individuau Les-Vielha, que guanhèc er especialista italian Maurizio Fondriest.

Enes dues etapes de la “Volta” Ciclista a Catalunya 2018 dera Val d’Aran i collabòren eth Conselh Generau d’Aran e er Ajuntament de Vielha e Mijaran.

Eth vicesindic d’Aran, Luís Carlos Medina, a comentat que, maugrat èster fòrça lèu entà parlar de nòms, serà ua bona escadença entà tornar a veir es melhors ciclistes deth mon coma ja auérem escadença de hè’c damb era etapa deth Tour de França deth 10 de junhsèga der an 2016 qu’auec era sua gessuda ena Val d’Aran.

Medina, tanben s’a referit ath hèt que damb era arribada e gessuda d’etapa d’era “Volta” ena Val d’Aran, se referme era escomesa deth Govèrn d’Aran entà restacar-se a grani eveniments esportius e sustot ath ciclisme, que compde damb un gran nombre d’aficionadi ena Val d’Aran e damb ua aufèrta unica en tot eth Pirenèu de rotes de ciclotorisme e de BTT damb mès de 400 Km de rotes homologades e accessibles entà toti es nivèus.

Pera sua part, eth president de la “Volta” Ciclista a Catalunya, Rubèn Peris, a soslinhat que tornar ara Val d’Aran dempús de tanti ans ei ua excellenta notícia entara Volta, donques poderam gaudir d’un gran espectacle damb es melhors ciclistes e equipes deth mon ena Val d’Aran a on se respire ciclisme e qu’ei tot un referent tàs aficionadi dera biciclèta.

Comments are closed.