Vielha, 18 de gèr de 2018.- Des d’ager e enquiath dia 21 de gèr era Val d’Aran presente era sua aufèrta toristica ena 38au edicion dera hèira internacionau deth torisme FITUR, eth punt d’amassada globau entàs professionaus deth torisme e era hèira lider entàs mercats receptius e emissors.

Era Val d’Aran participe ena hèira en stand de Catalonha dera Agéncia Catalana de Torisme.

Eth Parlament Europèu a declarat 2018 coma An Europèu deth Patrimòni Culturau. En tot profitar era centralitat qu’era cultura a en aguest 2018 entà declarar er An deth Torisme Culturau 2018, damb eth rèpte de propiciar qu’eth torisme poténcie era cultura e er auviatge culturau, tant materiau coma immateriau, era Val d’Aran e era Agéncia Catalana de Torisme vòlen potenciar ath maximal era singularitat dera cultura entà atrèir torisme familhau, d’aventura o de negòcis.

Era conselhèra de Torisme, Anna Díaz, expliquèc que coma novetats dera Val d’Aran en FITUR 2018 se presentarà eth nau Centre d’Interpretacion dera Natura qu’amassa damb eth Refugi dera Artiga de Lin, refortilharàn aguest lòc emblematic dera Val d’Aran damb era natura coma principau reclam toristic, e tanben eth Centre d’Interpretacion des Hèstes deth Huec en Les, que se trabalhe entà poder aué’c prèst entà Sant Joan.

Anna Díaz, destaquèc un còp mès que “damb era implantacion deth Sistèma de Torisme Responsable e era obtencion deth certificat Biosphere, era Val d’Aran contunhe en tot auançar entà un nau modèl de desvolopament toristic basat enes principis dera sostenibilitat, era diuersitat culturau e era responsabilitat sociau, çò que contribuís a qu’era Val d’Aran sigue ua destinacion toristica basada en respècte e era promocion deth sòn ric auviatge e dera sua cultura amassa damb eth miei ambient e era responsabilitat “.