Es cooperatives coma modèl empresariau en CEI Val d’Aran

Vielha, 28 de seteme de 2018.- Eth CEI Val d’Aran de Casau amassa damb er Atenèu Cooperatiu deth Naut Pirenèu e Aran organize un cors gratuït de formacion dirigida a prescriptors/es, gestories e assessories entà conéisher es cooperatives coma modèl empresariau.

Eth cors aurà lòc en CEI Val d’Aran, Plaça Naua, 1 de Casau eth pròplèu dimèrcles 3 d’octobre entre es 16:00 e es 19:00 ores.

Es objectius d’aguesta formacion son entre ues autes conéisher es cooperatives coma modèl empresariau, saber es obligacions ena gestion des projèctes cooperatius, arreconéisher es activitats proclives de constituïr-se en cooperativa e conéisher es passi entà constituïr ua activitat professionau o empresariau en cooperativa.

Ei ua iniciatiua promoiguda peth Departament de Trabalh, Ahèrs Sociaus e Familhes damb er objectiu de dar a conéisher e impulsar era economia sociau, eth tresau sector e es cooperatives coma modèl d’economia transformadora que genère riquesa e emplec estable e de qualitat.

Er Atenèu Cooperatiu deth Naut Pirenèu e Aran ei part d’un projècte mès globau, eth hilat d’atenèus cooperatius, format per 14 atenèus e mès de 130 entitats publiques e privades. Es projèctes e es accions impulsades des der atenèu, se dirigissen principauments a persones emprendredores, projèctes emergenti, associacions, cooperatives e entitats dera economia sociau, gestories e assessories, persones parades o trabalhadores d’enterpreses pròplèus ath barrament, e tanben ar alumnat de segondària, bachillerat, cicles e universitats e personau des administracions publiques, damb era fin de convertir-se en un espaci de referéncia en territòri, visibilizar e fomentar era creacion de naues enterpreses dera economia sociau, eth tresau sector e es cooperatives.

S’es interessat en cors pòs obtier mès informacion e reservar era tua assisténcia en tot telefonar ath 973 64 18 01 o ath corrèu ceivaldaran@aran.org.

Comments are closed.