Es dies 2 e 3 de hereuèr arribe era 40au edicion dera Marxa Beret

Vielha, 25 de gèr de 2019.- Era 40au edicion dera Marxa Beret, era pròva d’esquí nordic mès assolidada que se realize en territòri nacionau se celebrarà es pròplèus 2 e 3 de hereuèr ena Val d’Aran.

Eth dissabte 2 de hereuèr, as 10:00 ores, se celebrarà era pròva de Sprint Salomon, qu’aguesta edicion serà tanben Campionat d’Espanha de Sprint ena modalitat de tecnica liura. Eth dimenge 3 de hereuèr se disputarà era 40au edicion dera Marxa Beret, damb un circuit popular de 10 km ena zòna de Beret e Orri; eth de 21 km ena zòna de Beret, Orri e Montgarri e fin finau eth circuit de 42 km ena zona de Beret, Orri, Montgarri e direccion Marimanha. Eth recorregut definitiu ac decidiràn es tecnicians era darrèra setmana abans der eveniment en foncion des condicions.

Era Marxa Beret, qu’enguan arribe ara 40au edicion, data der an 1977. Era edicion deth 2019 ei includida en calendari FIS de carrères populares, Campionat d’Espanha de Longa distància e Copa Espanha d’Esquí de hons.

Es inscripcions se pòden realizar en Internet, a trauès dera pagina web dera Marxa Beret, www.marxaberet.com, Enquiath 1 de hereuèr, e es inscripcions presenciaus auràn lòc ena Casa d’Acuelhuda, en Salardú, eth 2 de hereuèr. Peth moment es inscripcions online an superat es 500 inscriti çò que hè a pensar en ua bona participacion ena 40au edicion dera Marxa Beret 2019. Era pròva cada an compde damb mès de 1.000 participants de tota Euròpa.

Era Marxa Beret ei organizada peth Conselh Generau d’Aran, Baqueira Beret e er ajuntament de Naut Aran. Compde damb era collaboracion dera Associacion Volentaris Val d’Aran, Foment Torisme Val d’Aran, Deputacion de Lhèida, Ajuntament de Vielha e Mijaran, Pompièrs d’Aran, Aran Salut, Mossos d’Esquadra, INS d’Aran, ath delà dera Reau Federacion Espanhòla Espòrts d’Iuèrn (RFEDI), era Federació Catalana d’Esports d’Hivern (FCEH) e es desparièrs patrocinadors.

Entà commemorar era 40au edicion dera Marxa Beret s’a organizat ua exposicion en Salardú qu’includirà fotografies d’anteriors edicions, dorsaus e materiau restacat damb era longa istòria d’aguesta pròva d’esquí nordic.

Programa

Diuendres, 1 de hereuèr

– 16:00: Dubertura dera Sala d’Inscripcions

– 20:30: Barrament Sala d’Inscripcions

Dissabte, 2 de hereuèr

– 09:00: Dubertura dera Sala d’Inscripcions

– 10:00: Campionat d’Espanha “Sprint Salomon” Plan de Beret

– 19:00: Despartiment de prèmis Campionat d’Espanha.

– 19:30: Presentacion 40au Marxa Beret

– 21:00: Barrament dera Sala d’Inscripcions

Dimenge, 3 de hereuèr

– 10:00: Gessuda 40au Marxa Beret

– 13:30: Despartiment de prèmis

– 14:00: Ceremònia de Clausura

– 15:00: Barrament deth circuit

Mès informacion en: www.marxaberet.com.

 

 

Comments are closed.