Vielha, 12 de mai de 2018.- Aguesta darrèra net ena ribèra der arriu Valarties apuprètz 500 mètros deth Pònt de Sant Pelegrí, que delimite eth nuclèu damb er inici dera pista forestau, s’a produsit un esbauçament de granes dimensions qu’a crotzat er arriu e a afectat ara pista d’accès ath Montarto, en tot depassar eth cabau der arriu e en tot remontar eth vessant contrari.
En aguest punt existís ua linha electrica de mieja tension que s’a vist afectada peth esbauçament pr’amor qu’a produsit era trencadura d’un des sòns supòrts, que supausadaments a provocat un petit talh deth subministrament electric a ua part dera poblacion d’Arties, qu’a estat reposada automaticaments. Era coïncidéncia d’aguest micro-talh de subministrament poderie indicar era ora en que se produsic er esbauçament, que se calcule que poderie èster ath torn des 23 ores dera darrèra net.
Era afectacion de milièrs de m3 desplaçadi afècten dirèctaments a mès de 200 mètros de longitud dera pista forestau e an provocat era afectacion des depausi d’aigua potabla d’Arties. Aué madeish es maquines trabalhen entà hèr possible er accès as depausi d’aigua e avalorar es possibles damatges en aguesta installacion.
Eth sindic d’Aran, Carlos Barrera, expliquèc qu’es finques existentes entre er arriu Valarties e era pista forestau an demorat totauments afectades pera brutau acumulacion de tèrra, arròques e arbes. En aguest sens es Pompièrs d’Aran damb eth supòrt der elicoptèr deth GRAE dera Generalitat de Catalonha, an realizat un vòl de reconeishement entà endonviar s’ena part nauta dera ribèra (Restanca e Montarto), i a veïculs estacionadi o persones que se trobèssen en aguest moment pera zòna.
Ena part centrau der esbauçament passe un barranc d’aigua damb un cabau continu. Aguest aforament d’aigua pòt èster era possibla causa de que s’age generat ua grana borsa qu’a eth trincar-se i a rosigat toti es materiaus.
Enes pròplèus ores s’analisarà quines an estat es possibles causes d’aguest esbauçament, entà determinar s’a estat frut des intenses ploges des darrèri dies o se peth contrari i a quauqua auta causa.