Vielha, 18 de mai de 2018.- Eth Govèrn d’Aran a adjudicat ara enterpresa Audigintraesa SA era redaccion deth projècte TRANSGARONA deth camin naturau der arriu Garona des de Vielha ena termièra damb França, laguens deth projècte transfronterièr compartit entre eth Conselh Generau d’Aran e eth Conseil Départemental de l’Haute Garonne.
Eth projècte TRANSGARONA peth qu’eth Conselh Generau d’Aran arreceberà ua subvencion de 813.689 €, consistís en un projècte transfronterièr de Parcours Cyclable (rota ciclista) entà júnher eth neishement der arriu Garona ena Val d’Aran e era ciutat de Toulouse, destinat a favorir era mobilitat de bens e persones, en tot melhorar per exemple era aufèrta de transpòrt transfronterièr respectuós damb eth miei ambient que favorisque es desplaçaments tant de persones coma de mercaderies.
Es trams d’actuacion son:
– Tram 1: Termièra – Pònt de Rei
– Tram 2: Pònt de Rei – Pontaut
– Tram 3: Pontaut – Lana de Les
– Tram 4: Lana de Les – Pònt de Her
– Tram 5: Pònt de Her – Pònt deth Lop
Es activitats de cicloturisme, biciclèta de montanha e senderisme son en plen auge ena nòsta societat. Entath desvolopament sostenible tant des zònes mès urbanizades com ruraus, era existéncia de rotes alternatiues as carretères engodronades ei fonamentau entà promòir ua mobilitat lenta e sostenible, tant ena escala locau coma de connexion mejançant granes rotes. En aguest sentit eth Camin naturau Ciclable peth cors der arriu Garona preten completar era gran rota nòrd-sud que trauessarà es Pirenèus e que serà capabla de connectar es granes propòstes existentes a un costat e aute des Pirenèus.
Eth Camin natural Ciclable connectarà er actuau “Parcours Cyclable de la Garonne” en França damb eth neishement der arriu Garona en tot trauessar era Val d’Aran. Eth nau pas permet júnher es propòstes de grans rotes existentes a costat e costat des Pirinèus de forma que eth pas pera Val d’Aran constituirà en futur eth principau e unic pas en bicicleta del Pirinèus Centrals.
Audingintraesa SA ei ua des enterpreses líders dedicades a prestar servicis d’engenharia e consultoria entà diferenti sectors economics e estrategics, que compde damb ua equipa de 250 professionaus e dispòse de mès de 3.700 collaboradors per tot eth mon.
Er impòrt d’adjudicacion deth projècte ei de 26.039,20 €.
Eth projècte TRANSGARONA deth camin naturau ciclable der arriu Garona ei part deth Programa de Cooperacion Territoriau Europèa INTERREG V-A (Espanha-França-Andòrra) POCTEFA 2014-2020.
POCTEFA ei un programa europèu de cooperacion transfronterièra creat entà fomentar eth desvolopament sostenible, atau coma entà refortilhar era integracion economica e sociau deth territòri de Catalonha que limite damb França e Andòrra, a trauès deth finançament de projèctes dessenhadi e geridi per organismes publics e privadi des dus costats des Pirenèus. Eth Programa se finance a trauès deth Hons Europèu de Desvolopament Regionau (FEDER).