Eth Conselh Generau d’Aran contunhe es inversions damb er objectiu de melhorar era gestion dera recuelhuda selectiva de residus

Vielha, 8 de hereuèr de 2019.- En darrèr semèstre de 2018 eth Govèrn d’Aran a invertit 472.000 € en infrastructures dera gestion de residus municipaus, en centre de recuelhuda de residus de Beusa en Vielha e Mijaran, en centre de recuelhuda de Gessa e en Airau de transferéncia dera perimetral de Baqueira en Naut Aran, entà auançar ena melhora dera gestion d’aguest servici.

En aguest sens eth Conselh Generau d’Aran a aquerit ua pala cargadora e ua maquina compactadora de papèr e carton, amassa damb eth bastiment d’ua naua nau en centre de recuelhuda de Beusa, damb er objectiu d’estauviar viatges tanti intèrnes coma dehòra dera Val d’Aran dera gestion e transpòrt de papèr e carton. Er impòrt d’aguestes inversions ei de 391.115 €.

En Centre de recuelhuda de Gessa era accion consistís en renauiment deth barrament perimetral per un impòrt de 6.000 €.

En çò que tanh as accions amiades a tèrme en Airau de transferéncia dera perimetral de Baqueira en Naut Aran, s’a renauit eth barrament e s’an installat camèras damb ua inversion de 25.000 € qu’a anat a cargue der Ajuntament de Naut Aran e er ampliament dera zòna de compactadores a cargue deth Conselh Generau d’Aran damb un pressupòst de 50.000 €.

Eth Conselhèr de Territòri d’Aran, José Antonio Boya, a avalorat positivaments eth hèt que damb er ampliament deth centre de recuelhuda de residus de Beusa e er aquesiment de naua maquinària, melhore eth tractament deth papèr e deth cartón e tanben s’artenherà er estauviament de recorsi umans e economics en transpòrt d’aguest residu en çò que tanh ara recuelhuda laguens eth territòri d’Aran e ara ora de transportà’c en Lhèida. José Antonio Boya a volut arregraïr era collaboracion der Ajuntament de Naut Aran en çò que tanh as inversions en Airau de transferéncia dera perimetral de Baqueira, e un còp mès sustot era collaboracion e concienciacion des ciutadans entà arténher es chifres de reciclatge des darrèri ans ena Val d’Aran, a dit. Boya a destacat qu’enes darrèri 4 ans s’a incrementat un 25% era recuelhuda selectiva; era recuelhuda de matèria organica a incrementat eth 168%; e era disminucion de generacion de rèsta a estat deth 3,9%.

José Antonio Boya a soslinhat qu’aguestes inversions arresponen ar esfòrç deth Conselh Generau d’Aran entà arténher es objectius mercadi ena melhora dera gestion des residus en Aran e era prenuda de consciéncia dera importància de suenhar er entorn, valor de principau importància en cas dera Val d’Aran entath desvolopament sostenible e equilibrat des desparières activitats economiques que s’amien a tèrme e sustot dera activitat toristica coma principau activitat economica dera Val d’Aran

Fin finau, eth conselhèr de Territòri a arrebrembat qu’eth servici de recuelhuda de residus enes tres punts d’Aran ei gratuït entà particulars e a animat ara ciutadania a seguir en tot utilizar aguesti servicis.

Per d’auta part, eth Govèrn d’Aran a aprovat aguesta madeisha setmana ua addenda ar acòrd de collaboracion entre eth Conselh Generau d’Aran e Ecoembalajes España S.A., entà potenciar es recuelhudes selectives d’envasi.

Comments are closed.