Eth Conselh Generau d’Aran e Ecovidrio impulsen eth reciclatge de veire entre es otelèrs der Aran

Es ajuntaments dera Val d’Aran tanben participen dera campanha en que s’an hèt enquèstes a mès de 240 establiments entà conéisher es abituds de reciclatge de veire e adaptar es recorsi as sòns besonhs

Fuente: Correo Gallego

Fuente: Correo Gallego

Vielha, 26 de hereuèr de 2016.- Ecovidrio, entitat sense ànim de lucre encargat dera gestion deth reciclatge des residus d’envasi de veire en Espanha, e eth Conselh Generau d’Aran, comencen ua campanha entà impulsar eth reciclatge de veire en sector dera ostalaria, canau Horeca (Ostalaria, Restauracion e Catering).

Era iniciatiua, comencèc en deseme passat damb era realizacion d’enquèstes e entrevistes as establiments d’ostalaria de toti es municipis dera Val d’Aran entà conéisher de prumèra man quines son es sòns besonhs e poder adaptar es recorsi existents. Des d’alavetz, s’an visitat mès de 240 establiments que s’includissen entre eth bars, restaurants, otèls e locaus d’òci. Ath delà, pendent es visites Ecovidrio aufrís informacion detalhada de com reciclar corrèctaments e des avantatges sociaus e economiques deth reciclatge de veire.

En ua dusau fasa, e entà facilitar eth reciclatge de veire entre aguesti establiments que genèren granes quantitats de veire, a fins de gèr se comencèren a repartir ferrats de desparières capacitats entà separar corrèctaments es residus de veire e transportar-les as contienedors plaçadi en carrèr. Ath delà, s’installaràn naui contienedors VACRI, dotadi damb ua boca mès ampla e un sistèma d’elevacion idraulica a on s’encastre un ferrat especiuaments adaptat. D’aguesta manèra, ei fòrça facil e comòde reciclar grani volums de veire donques que, damb pòc esfòrç, se pòt voidar tot eth contengut deth ferrat, sense besonh de lançar es envasi un a un.

Era collaboracion d’Ecovidrio, eth Conselh Generau d’Aran e es ajuntaments dera Val d’Aran a coma principau objectiu arténher un increment dera taxa de reciclatge de veire en territòri.

Eth sector dera ostalaria e era restauracion ei un des èishi sus es quaus trabalhe Ecovidrio entà incrementar era taxa de reciclatge, donques que consumís apròp deth 50% des envasi de veire d’un solet emplec que se produsissen en tot er Estat.
Accion especifica en Baqueira

Pendent era campanha dirigida ara ostalaria, e en tot profitar era sason nauta en Baqueira Beret, damb era collaboracion der ajuntament de Naut Aran, s’amie a tèrme ua promocion especiau entre es establiments des nuclèus deth municipi de Naut Aran. S’an visitat mès de 122 establiments, que 75 se ne an aderit ara campanha damb er unic compromís de reciclar eth veire corrèctaments. Toti eri an participat en un jòc de qüestions sus eth reciclatge que culminarà damb eth tiratge d’un viatge a fin dera sason.

 

Donades de reciclatge de veire ena Val d’Aran

Segontes es darrères donades de 2015, es ciutadans dera Val d’Aran reciclèren un totau de 490.880 quilograms d’envasi de veire. Açò supause que cada abitant recicle ua mieja de 49 quilograms de veire, fòrça peth dessús dera mieja de Catalonha.

 

Ecovidrio

Ecovidrio ei era entitat sense ànim de lucre, encargada dera gestion deth reciclatge des residus d’envasi de veire en Espanha, des de 1998. Era companhia s’encargue de gestionar integralaments era cadea de reciclatge, mejançant era recuelhuda selectiva, eth transpòrt, eth tractament d’envasi de veire e era sua posteriora comercializacion.

Ecovidrio proporcione un servici public, universau e gratuït entath ciutadan e mèt a disposicion des companhies que envasen es sòns productes en veire un modèl de gestion eficaça e eficienta, tant des dera perspectiva ambientau coma economica.

Actuauments, un totau de 2.655 companhies son aderides a Ecovidrio. Es sectors integradi ena associacion representen mès de 3% deth PIB espanhòu e comercializen 99% des envasi de veire.

Comments are closed.