Eth Conselh Generau d’Aran e eth Conseil Départamental dera Haute Garonne impulsen un projècte transfrontalièr

Vielha, 18 de junhsèga de 2016.- Eth Conselhèr de Territòri deth Govèrn d’Aran, José Antonio Boya, a mantengut aué ua amassada de trabalh ena sedença deth Conselh Generau d’Aran, damb Didier Cujives, conselhèr departamentau deth canton de Pechbonnieu e damb Maryse Vézat-Baronia, conselhèra departamentau deth canton d’Auterive, entà començar es trabalhs deth projècte transfrontalièr deth Parcours Cyclable entre eth naishement der arriu Garona e era ciutat de Toulouse, entà incentivar era mobilitat des persones.

Entà poder materializar un projècte d’aguestes caracteristiques deuant era Union Europèa, s’an de besonh dues institucions de dus païsi desparièrs. En aguest cas eth projècte s’includirà laguens eth Programa POCTEFA 2014-2020 (Programa INTERREG V-A Espanha-França-Andòrra), programa europèu de cooperacion territoriau finançada damb hons FEDER, creat entà fomentar eth desvolopament sostenible deth territòri frontalièr entre aguesti païsi.

IMG_0854

Eth projècte conjunt entre eth Conselh Generau d’Aran e eth Conseil Départamental dera Haute Garonne, s’includirie en un des cinc èishi fonamentaus deth Programa POTECFA, destinat a favorir era mobilitat de bens e persones, en tot melhorar per exemple era aufèrta de transpòrt transfrontalièr respectuós damb eth miei ambient que favorisque es desplaçaments tanti de persones coma de merces.

En març passat, auec ua prumèra amassada en Le Mourtis damb representants deth Conselh Generau d’Aran, deth Conseil Départamental dera Haute Garonne e dera Communauté de Communes deth Cantón de Saint Béat, entà abordar dus projèctes transfrontalièrs conjunts entre institucions. Dempús dera jornada de trabalh d’aué, que tanben an participat tecnicians d’ambdues institucions, i aurà auta entre es mesi de noveme e deseme entà assolidar era prepausa.

 

Menuta de silenci pes victimes der atemptat de Niza

As 12 ores deth meddia, atau coma s’a hèt en totes es poblacions de França en dia d’aué, s’a sauvat ua menuta de silenci deuant deth Conselh Generau d’Aran, en solidaritat damb es victimes der atemptat dera setmana darrèra en Niza, qu’an participat representants deth Conselh Generau d’Aran e es representants deth Conseil Départamental dera Haute Garonne, qu’aué s’an desplaçat ara Val d’Aran.

IMG_0870

Comments are closed.