Eth Conselh Generau d’Aran establís damb era Universitat de Barcelona un programa conjunt de seguiment dera fauna, era flòra, e es comunitats animaus

sindic-cga-ub

Eth sindic d’Aran, Carlos Barrera e eth rector dera Universitat de Barcelona, Dídac Ramírez, an signat un convèni entad establiment d’un marc globau de collaboracion entre era Universitat de Barcelona e eth Conselh Generau d’Aran, en encastre dera Val d’Aran, entà establir un programa conjunt de seguiment dera fauna, era flòra, e es comunitats animaus e vegetaus, en tot considerar es sues interrelacions intra e intercomunitàries e eth païsatge e analisi biodemografic des poblacions umanes.

Aguesta collaboracion, per part dera Universitat de Barcelona se desvoloparà ena Facultat de Biologia mejançant es sòns diferenti departaments.
Eth desvolopament d’aguesta collaboracion iniciau s’establís a trauès d’ua programacion especifica que s’elaborarà de comun acòrd entre ambdues parts. Aguesta programacion serà sometuda ara aprobacion des autoritats competentes cossent damb es procediments establidi per cadua des parts e serà objècte dempús de convènis especifics oportuns.

Eth marc de collaboracion poderà estener-se as següentes activitats:

– Escambi de materiaus d’investigacion, (documents scientifics e pedagogics, publicacions e bases de donades estacades as tèmes d’estudi)

– Participacion de sojorns de perfeccionament entà estudiants, professors e/o investigadors.

– Participacion en conferéncies, seminaris, collòquis, exposicions e d’autes activitats organizades per quinsevolhe des parts.

– Constitucion d’equips conjunts de recèrca.

– Implicacion e participacion der alumnat dera Facultat de Biologia en projèctes estacadi ath desvolopament des matèries: Pràcticum I, Pràcticum II e Trabalh Fin de Grad (TFG).

– Assessorament ena matèria de gestion des especies dera flòra, fauna, comunitats vegetaus e animaus, abitats e eth païsatge.

– Analisi biodemografic des poblacions umanes

Cada institucion a designat un coordinador encargat entà per’mor de supervisar eth desvolopament d’aguest convèni marc. Per part deth Conselh Generau d’Aran, s’a designat coma coordinador ath vicesindic prumèr d’Aran, Luís Carlos Medina, dera UB eth coordinador serà eth vicedegà academic dera Facultat de Biologia, Gustavo A. Llorente.

Es coordinadors elaboraràn amassa, prepausaràn e activaràn es convènis especifics cossent damb eth programa d’activitats que se prepausen impulsar.

“Des deth govèrn deth Conselh Generau d’Aran auem previst desvolopar estudis de seguiment dera diuersitat dera fauna, flòra e vegetacion des sistèmes naturaus dera Val d’Aran, que permeten dar es pautes d’accion entara mantenença dera riquesa deth nòste païsatge e dera nòsta fauna. Èm interessadi en collaborar damb autes entitats entà aprigondir ena coneishença d’aguest patrimòni”, a manifestat eth sindic d’Aran, Carlos Barrera, qu’a ahijut “tant eth Conselh Generau d’Aran coma era Universitat de Barcelona èm interessadi en somar esfòrci e establir camins d’accion qu’afavorisquen e incrementen eth benefici mutuau”.

Comments are closed.