Eth Conselh Generau d’Aran inície es òbres de manteniment e reabilitacion dera zòna deth Parc infantil de Les

• Dempús des aiguats deth 2013 eth parc infantil de Les se vedec fòrça afectat per aguest episòdi.

• Eth parc infantil a ua superfícia de 2.425 m2 apuprètz.

DSC_0164

 

Eth Departament d’Agricultura, Ramaderia e Medi Naturau deth Conselh Generau d’Aran, mejançant era empresa Servicis Ambientaus dera Val d’Aran (SAVA, S.L.) a iniciat aguesta setmana era actuacion en Parc infantil de Les que consistís principauments ena reabilitacion e manteniment deth parc, en tot hèr prètzhèts de sanejament e neteja des murs perimetraus de pèira, en tot rehèr era pèira afectada, tanben se reabilitaràn autant es paviments e sètis de pèira naturau coma es jòcs de husta deth parc infantil, se dotaràn es zònes de jardin des elements de proteccion de besonh damb baranes metalliques similars as existentes e se reposicionaràn es elements d’illuminacion deterioradi pes aiguats damb lampadaris.

 

DSC_0175

 

En paraules deth conselhèr d’Agricultura, Ramaderia e Medi Naturau d’Aran, Jose Enrique Arró, “un còp finalizades totes es òbres, eth Conselh Generau d’Aran prenerà er acòrd de hèr era cession d’usatge d’aguestes installacions ath pòble de Les entà que poguen gaudir es sòns mainatges e visitants”.

 

DSC_0173

 

Eth conselhèr de Territòri d’Aran, Jose Antonio Boya a hijut “quan se harà efectiva era cession d’usatge, eth manteniment d’aguest parc anarà a cargue der Ajuntament de Les qu’a considerat tostemp aguesta installacion coma un element fòrça positiu entar atractiu deth pòble, realitat pleaments compartida peth Govèrn d’Aran”.

Eth periòde d’execucion totau d’aguesta accion ei de tres mesi.

 

 

 

Vielha, 26 de hereuèr de 2016

 

Conselh Generau d’Aran: Núria Sanjuan

 

Comments are closed.