Eth Conselh Generau d’Aran recolze a Òscar Cadiach entà anar ath Broad Peak e completar eth sòn darrèr 14au ueit mil

  • Òscar Cadiach aspire a obtíer eth ueit mil que li demore entà completar es catorze ueit mil.
  • Portarà eth drapèu dera Val d’Aran ath tuc.

DSC_0213

Òscar Cadiach damb eth vicesindic d’Aran, Luis Carlos Medina, e damb era conselhèra de Torisme e Desvolopament Economic d’Aran, Anna Díaz.

 

Eth 28 d’agost de 1985 er aupinista, Òscar Cadiach (Barcelona, 1952), siguec amassa damb Antoni Sors e Carles Vallès, eth prumèr alpinista catalan en obtíer eth tuc der Everest. Ei eth catalan qu’a hèt mès tucs que passen es ueit mil mètres: Everest (2 còps), Lhotse, Makalu, Cho Oyu (2 còps), Nanga Parbat, Gasherbrum II, Manaslu, Annapurna e Dhaulagiri.

En 1984 damb Jordi Magrinyà obtenguec eth sòn prumèr ueit mil, eth Nanga Parbat (8.125m). Er an següent hec part damb Antoni Sors e Carles Vallès, dera prumèra cordada catalana en obtíer er Everest (8.848 m), tuc que coronèc de nau eth 1993 eth versant nepalés. A principis deth decènni de 1990 inicièc era exploracion deth versant chinés deth Karakorum en tot pujar eth Broad Peak peth versant nòrd er an 1990 solet e en tot daurir era rota Fem Tarragona en Broad Peak centrau eth 1992, totes dues sense hèr tuc. Eth 1996 dauric damb er alpinista austriac Sebastian Ruckesteiner era via Free Tibet en Cho Oyu.

A participat en fòrça expedicions a diferenti continents: en Africa, en Kenya eth 1974, e en Ahaggar d’Algèria es ans 1979 e 1980; en America deth Sud, enes Andes eth 1978 e era Patagònia eth 1986; e en Asia, ath Karakorum eth 1981, 1988 e 1994, e ath Himalàia eth 1982, 1987, 1989 e 1993. Ath delà, coma guida de nauta montanha, a dirigit grops d’alpinistes en Aconcagua eth 1989, en Kilimanjaro eth 1995 e a tucs der Imalaia eth 1997 e 1998, e ath Karakorum eth 1999. Ei eth prumèr occidentau en pujar ar Everest sense oxigèn e peth versant nòrd. A part d’alpinista, tanben ei fotògraf e camèra de nautada. A realizat diuèrses pellicules des sues expedicions e a guanhat prèmis peth mon, e er an 2000 participèc en ua expedicion coma protagonista d’un documentau sus era ascension de George Mallory e Andrew Irvine deth 1924 en Everest entath programa de Television Espanhòla Al filo de lo imposible.

Er aupinista tarragonin damb casa en Vilamòs (Val d’Aran), Òscar Cadiach, tornarà a sajar eth Broad Peak eth pròplèu mes d’octobre e portarà eth drapèu dera Val d’Aran ath tuc deth sòn 14au ueit mil.

Eth vicesindic d’Aran, Luis Carlos Medina, amassa damb era conselhèra de Torisme e Desvolopament Economic d’Aran, Anna Díaz, an arrecebut a Òscar Cadiach de cara ara pròplèu expedicion deth tarragonin ad aguest tuc de 8.047m a on eth Govèrn d’Aran esponsorizarà ar aupinista .
Arrebrembam qu’era Val d’Aran acuelherà ua pròva dera Copa deth Mon d’Esquí de Montanha es dies 8 e 9 d’abriu de 2017.

En paraules deth vicesindic d’Aran, Luis Carlos Medina “er includiment dera Val d’Aran ath calendari dera ISMF World Cup 2017, supause un pas mès ena consolidacion d’Aran coma destinacion esportiua de pròves de naut nivèu internacionau, ath delà dera consolidacion coma sedença de referéncia entà pròves d’esquí de montanha”. Medina a hijut “era rota ar Aneto peth versant aranés a cada viatge mès afluéncia e damb eth supòrt a Òscar Cadiach volem que se restaque era Val d’Aran damb era nauta montanha”.

Er aupinista portarà es logos deth Conselh Generau d’Aran enquiath tuc d’aguest ueit mil deth Karakorum e tota era imatge corporativa de Foment Torisme Val d’Aran ena indumentària dera expedicion, que se pòt alongar uns cinquanta dies a compdar dera sua marcha.

Cadiach tornarà ad aguesta montanha deth Pakistan eth pròplèu mes d’octobre, quan demore trobar melhores condicions qu’es deth mes de junhsèga e agost que li heren a renonciar eth sòn assag.

 

 

Vielha, 23 de seteme de 2016

 

Conselh Generau d’Aran: Núria Sanjuan 

Comments are closed.