Eth Conselh Generau d’Aran restaure dus libres de capítols deth Conselh dera Bartièra, comuns de Salardú e Tredòs

libres

Eth Conselh dera Bartièra ère format pera associacion dera vila de Salardú e eth pòble de Tredòs. Enes dus libres de capítols que s’an conservat s’arremassen es ordinacions que regien aguest conselh e toti es acòrds redactats entre 1596 e 1735.

En paraules dera directora der Archiu Generau d’Aran, Maria Pau Gómez“ei plan curiós coma aguesti dus libres an estat custodiats en dus hons diferents. Eth libre mès antic (1596-1692) se conserve en hons dera Colleccion Val d’Aran. Dipòsit Antic Hospital de Santa Maria de Lleida. Aguest hons ingresse en Archiu Generau d’Aran eth 25 de març de 2011 procedent der Institut d’Estudis Ilerdencs que l’auie custodiat enquia alavetz. Eth libre posterior ad aguest esmentat (1693-1735) se conserve en hons patrimoniau de Çò de Cardenau e Çò de Menescau de Salardú. Eth sòn ingrès auec lòc eth 28 de hereuèr de 2007 e arremasse era documentacion familiara, personau e patrimoniau dera família Mòla Castèth des de Cardenau e dera família Jaquet des de Menescau de Salardú, deth sègle XVIII enquiath sègle XIX”.

Es dus libres an estat restaurats peth talhèr Estudi B2 de Barcelona, restauradores Carme Bello e Àngels Borrell.

_MG_6763

Eth cap de Cultura e Patrimòni d’Aran, Jèp de Montoya, a soslinhat “es trabalhs an consistit en desmontatge des libres; neteja en sec; neteja umida; consolidacion e reintegracion deth supòrt e aplanament. Atau madeish, cada libre s’a tornat a enquadernar de nau damb caperadèrs en pergamin”.

Es restauracions se programen annaument a trauèrs deth pressupòst der Archiu Generau d’Aran gestionat peth Conselh Generau d’Aran.

Comments are closed.