• Se traspassen foncions en proteccion civiu, comèrç e artesania, archius e patrimòni hestiu, atau coma er immòble qu’aucupaue era antiga Residéncia de Léser e Temps Liure (de Les), tau coma acordèc era Comission bilaterau eth dia dera sua constitucion, eth passat 20 de hereuèr en Vielha
• Eth Conselh Generau d’Aran s’encargarà, entre d’auti, d’establir ua infrastructura basica tecnica de proteccion civiu, fomentar era activitat comerciau e artesanau, o dirigir e gerir er Archiu Generau d’Aran
Amassada deth Conselh Executiu dera Generalitat de Catalonha. Foto: Generalitat de Catalonha
Eth Govern a aprovat es prumèrs decrèts de traspàs de foncions e servicis dera Generalitat de Catalonha ath Conselh Generau d’Aran, a compdar dera entrada en vigor dera naua Lei deth regim especiau d’Aran, aprovada per majoria absoluta eth passat 12 de gèr en Parlament de Catalonha. Eth concrèt, se traspassen foncions de proteccion civiu, archius, patrimòni hestiu, e comèrç e artesania e era titolaritat dera antiga Residéncia de Léser e temps liure (de Les) per un impòrt globau de 240.000 èuros. Er executiu materialize atau es acòrds adoptadi pendent era constitucion dera Comission bilaterau Govèrn dera Generalitat- Conselh Generau d’Aran, celebrada eth passat 20 de hereuèr en Vielha.
Proteccion civiu
Era situacion geografica deth territòri aranés, caracterizada per un entorn montanhós e ua climatologia extrèma, compòrte uns risqui evidenti entà bens, comunicacions e persones. Aguest entorn hè de besonh compdar damb ua infrastructura basica tecnica de proteccion civiu, er establiment que ne serà assumida peth Conselh. Tanben serà responsable d’elaborar es plans de proteccion civiu, era planificacion e era prevencion des risqui en encastre territoriau d’Aran.
Era Generalitat e eth Conselh collaboraran entà méter en común informacion, avisi e previsions entà detectar risqui e actuar deuant d’ua situacion d’emergéncia. Tanben entà hèr era implantacion territoriau des plans d’emergéncia e d’autoproteccion, simulacres e programes de formacion e difusion en proteccion civiu.
Comèrç e artesania
Aran presente un hilat comerciau formada pes diferenti municipis deth territòri e dirigida peth sòn cap-lòc, Vielha e Mijaran. Un nuclèu comerciau qu’arrecep fòrça visitants, que conforme eth comèrç de proximitat deth dia a dia des abitants d’Aran e que cau promòir e dinamizar. Eth Govern a aprovat traspassar ath Conselh es foncions següentes:
– Impuls, assessorament, promocion e organizacion de hèires e autes activitats entà promòir e dinamizar eth comèrç e era artesania d’Aran e des hèires especializades, laguens e dehòra d’Aran.
– Impuls ara formacion entà melhorar eth comèrç e era artesania.
– Foment dera activitat comerciau e artesanau.
Patrimòni hestiu
En matèria de patrimòni hestiu, eth Conselh Generau d’Aran assumís era declaracion des hèstes populares d’interès culturau der encastre territoriau d’Aran e era catalogacion des hèstes, manifestacions e celebracions comunitàries, atau coma es elements hestius damb vigéncia en Aran.
Direccion e gestion der Archiu Generau d’Aran
A compdar der 1 d’abriu, eth Conselh Generau d’Aran assumirà era direccion e gestion der Archiu Generau d’Aran. Se constituirà ua comission de seguiment que velharà entà coordinar es dues administracions en encastre des archius e era gestion documentau.
Traspàs dera titolaritat der immòble qu’aucupaue era antiga Residéncia de Léser e Temps Liure, de Les
Eth Govern a agranit es mejans traspassadi en matèria d’ensenhament, damb era cession ath Conselh Generau d’Aran dera titolaritat der immòble a on se plaçaue era antiga Residéncia de Léser e Temps Liure, ath tèrme municipau de Les. Era bastissa s’utilizarà entà activitats d’ensenhament, joenessa, torisme, servicis sociaus e autes matèries anàlogues de competéncia deth Conselh. Eth Govern se resèrve eth dret d’usatge, per part deth Departament d’Ensenhament, des installacions qu’aucupe er Institut d’Ostalaria de Les- Val d’Aran. Se formalizarà un convèni que regularà es drets e obligacions des dues parts. Es acòrds includissen eth traspàs ath Conselh Generau d’Aran de dues persones restacades ara Residéncia de Léser e Temps Liure e d’ua restacada ar Archiu Generau d’Aran.
Era Lei deth regim especiau d’Aran
Era Lei deth regim especiau d’Aran arreconeish era realitat nacionau occitana damb identitat culturau, istorica, geografica e lingüistica; establís eth regim especiau pròpri d’Aran entà protegir-ne eth caractèr singular, es drets istorics, era identitat, eth dret e era organizacion institucionau, politica e administrativa, e ne garantís es competéncies, es recorsi e era autonomia pr’amor que governe es sòns interèssi.