Eth Hilat de Musèus des Tèrres de Lhèida e Aran inície era celebracion deth Dia Internacionau des Musèus en Vilac

Vielha, 14 de mai de 2018.- Deth 14 ath 20 de mai damb eth lèma “Museus hiperconnectats: nous enfocaments, nous públics”, eth Hilat de musèus des Tèrres de Lhèida e Aran celèbre es activitats deth Dia Internacionau des Musèus (DIM), que se celèbre annauments eth 18 de mai, damb eth plantejament d’ua enigma virtuau que, en tot seguir eth hashtag #DIMisteri2018, se dirigirà as usatgèrs des hilats sociaus. En aguest jòc ludic cada musèu publicarà ues imatges enes hilats “en tot informar” sus un hèt misteriós restacat damb es respectives colleccions. A compdar d’ací, es usatgèrs les calerà endonviar qué passe en cada musèu e quina connexion s’a establit entre es musèus deth hilat.

Eth plantejament deth DIM d’enguan arrespon a qu’es naues tecnologies permeten as musèus arribar mès ath delà deth sòn public abituau, en tot presentar es sues colleccions d’ua forma diuèrsa e totauments innovadora. Entà promòir es connexions entre musèus e es naues formes de comunicacion damb es usatgèrs, es musèus deth hilat promoiràn un jòc virtuau.

Eth dimars, dia 15 de mai entàs 12:00 ores aurà lòc ena glèisa de Vilac ua arròda de premsa entà presentar es activitats que s’amiaràn a tèrme en Hilat de Musèus des Tèrres de Lhèida e Aran entà celebrar eth dia Internacionau des Musèus e era Net des Musèus, que i participaràn Carmen Bergés, presidenta deth Hilat de Musèus des Tèrres de Lhèida e Aran, e Carla del Valle, directora deth Musèu dera Val d’Aran.

Eth DIM ei un eveniment organizat peth Comitat Internacionau des Musèus (ICOM) des der an 1977, qu’a coma objectiu concienciar as ciutadans sus eth papèr des musèus en desvolopament des societats.

Hèn part deth Hilat de Musèus des Tèrres de Lhèida e Aran, er Ecomusèu des Valls d’Àneu (Esterri d’Àneu), eth Musèu Comarcau de Cervera (Cervera), eth Musèu Comarcau der Urgelh (Tàrrega), eth Musèu d’Isona e era Conca Dellà (Isona e Conca Dellà), eth Musèu d’Art Jaume Morera (Lhèida), eth Musèu dera Noguera (Balaguer), eth Musèu de Lhèida: Diocesan e Comarcau (Lhèida), eth Musèu dera Val d’Aran (Vielha e Mijaran), eth Musèu Diocesan d’Urgelh (Era Seu d’Urgelh), eth Musèu Diocesan e Comarcau de Solsona (Solsona) e eth Musèu de Guissona (Guissona).

 

Hònt: Hilat de Musèus des Tèrres de Lhèida e Aran

Comments are closed.