Eth “Liceu a la fresca” arribe en Sant Joan d’Arties

Vielha, 8 de juny de 2018.- Eth dissabte 16 de junh entàs 22 h ena glèisa de Sant Joan d’Arties se projectarà era opèra “Manon Lescaut” de Puccini, en Licèu ara fresca 2018.

Eth Licèu ara fresca ei ua proposicion deth Gran Teatre del Liceu entà difóner era musica e era opèra. Se tracte d’un projècte divulgatiu damb un objectiu principau, qu’era opèra arribe a totes es persones, e que totes ne poguen gaudir d’ua forma atractiva, accesibla e informau. Açò s’artenh gràcies ara collaboracion entre eth Liceu e es diuèrses entitats e ajuntaments interessadi que projècten en ua pantalha giganta, e per miei d’ua retransmission en faus dirècte, era opèra que se represente en Liceu en aqueth moment.

Enguan eth Gran Teatre del Liceu en collaboracion damb eth Musèu dera Val d’Aran, eth Conselh Generau d’Aran e er Ajuntament deth Naut Aran an establit un convèni entà poder hèr a arribar eth Licèu ara fresca ena Val d’Aran. Era glèisa de Sant Joan d’Arties, pes sues caracteristiques arquitectoniques e eth sòn entorn, ei eth lòc escuelhut entara projeccion eth dissabte 16 de junh dera opèra de Puccini “Manon Lescaut”. Ua opèra qu’enguan enlace damb era tematica seleccionada entad aguest 2018 peth Musèu dera Val d’Aran, era hemna, e que se da a conéisher damb eth #anderahemna.

Era opèra “Manon Lescaut” siguec eth prumèr gran triomf de Giacomo Puccini en 1893. Se tracte d’ua opèra basada ena òbra der abad Prévost, “L’historie du chevalier des Grieux et de Manon Lescaut” a on se narre era ascension e caiguda de Manon Lescaut.

Era òbra ei interpretada, enes sòns papèrs principaus, per diuèrses sopranos e tenors de fama internacionau, Ludmyla Monastyrska, Maria Pia Piscitelli, Gregory Kunde, Jorge de León e Rafael Davila.

Des deth Musèu dera Val d’Aran vos convidam a gaudir eth dissabte 16 de junh entàs 22 h, ena glèisa de Sant Joan d’Arties, dera opèra “Manon Lescaut” de Puccini.

Comments are closed.