Eth patinador deth CEGVA, Tomàs Llorenç, enludís damb dus triple lutz e se penge er argent ena Challenge

Tomàs Llorenç, deth CEGVA, participèc ena competicion internacionau de patinatge artistic sus gèu Challenge Cup dera Haya (Olanda)

• Deth 18 ath 22 de hereuèr se celebrèc era prestigiosa pròva internacionau

credit_FEDH_Tomas_Guarino_challenge_cup_Foto: FEDH

 

Eth patinador deth Club Espòrts de Gèu Val d’Aran (CEGVA), Tomàs Llorenç Guarino, artenhec dissabte passat, 21 de hereuèr, era medalha d’argent ena categoria novice ena Challenge Cup dera Haya (Olanda) mercés a dus grani exercicis cargadi de dificultat, que reportèren ua puntuacion finau de 103.69.

En programa cuert deth prumèr dia se recomponie d’un mau inici damb ua caiguda en triple lutz en quau non completaue era rotacion mès, posterioraments, executaue perfectaments eth doble axel, era combinacion tripla + dobla toe, dues piruetes de nivèu 3 e ua sèria de passi nivèu 2. Obtiege 32.23 punts que li plaçauen, provisionauments, en dusau lòc. Artenhec mantier aguest lòc eth maitin deth dissabte en liure a on artenhie realizar enquia dus triple lutz, un saut fòrça complicat. Tanben presentaue dus triple toes encara qu’eth dusau leugèraments mancat, triple salchow, doble axel e doble lutz. En aguest cas, arribaue a nivèu 3 tant enes piruetes, coma enes passi. Un programa practicaments net damb ua impressionanta basa de dificultat entà un patinador novice, que se tradusie en ua avaloracion de 71.46 punts. Li acompanhèren en pòdi eth japonés Sena Miyake (aur) e er alemand Marvin Römpler (bronze).

Comments are closed.