Arròs, 30 de mai de 2016.- Eth Plen deth Conselh Generau d’Aran, amassat en session extraordinària, a aprovat per unanimitat ua declaracion institucionau, acordada per consensus per totes es fòrces politiques que son representades, sobre era celebracion des 25 ans dera reinstauracion deth Conselh Generau d’Aran.

Eth sindic d’Aran, Carlos Barrera, a començat eth Plen, en tot arregraïr eth trabalh de totes aqueres persones pertenents as desparières fòrces politiques araneses e as representants dera societat civiu, qu’en aguesti darrèri 25 ans an contribuït damb era sua dedicacion e esfòrç ath reconeishement deth hèt diferenciau aranés e ara sua defensa.

Eth 17 de junh d’enguan, se commemòren es 25 ans dera reinstauracion deth Conselh Generau d’Aran, dempús de qu’eth Parlament de Catalonha, aprovèsse eth 28 de junh de 1990 era prumèra Lei de Regim Especiau dera Val d’Aran. Aguest siguec un hèt trascendent entara istòria dera Val d’Aran, qu’ath long deth temps a manifestat repetidaments era fidelitat as sues institucions e era volontat d’exercir er autogovèrn e era gestion des ahèrs publics.

Aguesta volontat ja siguec hèta evident pes aranesi, quan eth 26 de junh de 1979, toti es membres des corporacions araneses escuelhudi enes prumères eleccions democratiques, creèren ena glèisa de Cap d’Aran era Comission Gestora Intermunicipau tara Reinstauracion des Institucions araneses e entà establir es àmbits de collaboracion damb es Institucions catalanes., Que dèc pas ara constitucion deth Conselh Generau Provisionau d’Aran, eth 2 de seteme deth madeish an.

Er Estatut d’Autonomia de Catalonha, aprovat en Parlament de Catalonha er an 1979, determinèc un prumèr reconeishement des drets istorics e lingüistics d’Aran, damb era disposicion addicionau prumèra qu’establie que “en marc dera Constitucion e deth present Estatut seràn arreconeishudes e actualizades es particularitats istoriques dera organizacion administrativa intèrna dera Val d’Aran “.

Eth 5 de hereuèr de 2015, apareish publicada en DOGC, era naua Lei de regim especiau d’Aran, dempús d’èster aprovada peth Parlament de Catalonha.

Es fòrces politiques representades en Plen deth Conselh Generau d’Aran, an aprovat aué era declaracion institucionau sobre era celebracion des 25 ans dera Reinstauracion deth Conselh Generau d’Aran, entà demanar ath Parlament de Catalonha e en Govèrn dera Generalitat que s’amie a tèrme eth desvolopament des disposicions recuelhudes ena naua Lei d’Aran, sustot aqueres destinades a exercir er autogovèrn e ara proteccion der emplec der aranés, en tot sollicitar en Govèrn dera Generalitat, maugrat eth moment de dificultat que passen per eth totes es institucions, eth desplegament immediat e efectiu dera Lei 1/2015, deth 5 de hereuèr, deth regim especiau d’Aran.

Entath sindic d’Aran, Carlos Barrera, “ei fòrça importanta poder acordar per consensus ua declaracion institucionau de totes es fòrces politiques representades en Conselh Generau d’Aran, entara celebracion des 25 ans dera reinstauracion deth Conselh Generau d’Aran, e per tant eth reconeishement der autogovèrn dera Val d’Aran”, didec.

Eth síndic d’Aran, Carlos Barrera, a anonciat qu’eth pròplèu dia 15 de junh, eth Plen deth Conselh Generau d’Aran, realizarà ua visita institucionau ath Parlament de Catalonha e as membres dera Taula deth Parlament, entà explicar “quini son es besonhs e es rèptes dera Val d’Aran entà poder exercir damb plenitud eth sòn autogovèrn. Aguest acte serà fòrça important, entà méter en valor era volontat d’un pòble d’auançar enes ahèrs publics qu’influïssenen en benefici des sòns ciutadans, e qu’assoliden era realitat dera existéncia dera capacitat d’autogovèrn deth Conselh Generau d’Aran”, remerquèc Barrera.

Carlos Barrera, a ahijut que “maugrat es dificultats economiques que passen per eth totes es administracions, eth Conselh Generau d’Aran, a artenhut seguir en tot mantier es servicis elementaris e basics entàs ciutadans dera Val d’Aran”; e que “era nòsta obligacion en aguesti moments ei eth desvolopament dera Lei d’Aran, donques que fòrça des aspèctes dera lei, non vien condicionadi pera disponibilitat economica, mès òc pera volontat e capacitat politica que pogue exercir era pròpria Val d’Aran, sense desbrembar evidentaments qu’auem d’auançar ena melhora deth finançament”.

Era recepcion institucionau en Parlament de Catalonha deth pròplèu dimèrcles 15 de junh, se dividirà en dues parts, era deth maitin, damb ua jornada de trabalh damb es membres dera Taula deth Parlament e era dera tarde, damb era recepcion institucionau en Parlament deth Plen deth Conselh Generau d’Aran.

Audio Sindic Plen deth Conselh Generau d’Aran: