Vielha, 15 de junh de 2018.- Eth Plen deth Conselh Generau d’Aran amassat en session ordinària acordèc aué per unanimitat de toti es grops demanar ara direccion generau de Politiques Ambientaus e Miei Naturau dera Generalitat de Catalonha era captura e era repatriacion der os Goiat, liberat en Palhars eth 6 de junh de 2016 en marc deth programa Piroslife. Er os Goiat, ei er unic exemplar qu’amie un colhar de seguiment per GPS que permet conéisher es sòns movements e era ubicacion damb un decalatge minim de 6 ores, çò que dificulte era sua localizacion a temps reau.

Eth sindic d’Aran Carlos Barrera, expliquèc qu’er acòrd ath qu’a arribat eth Plen deth Conselh ven motivat pes atacs reïteradi, eth comportament anomal e er instint agressiu der os Goiat e era sua fixacion peth bestia equin, eth manejament extensiu d’aguest bestia enes pastures de nauta montanha enes mesi de primauera, estiu e tardor dificulte enòrmaments era aplicacion de mesures de proteccion coma pòden èster era d’agropacion de ramats o barraments perimetraus.

Tanben cau auer en compde qu’es montanhes deth pirenèu en generau son montanhes umanizades damb ua importanta activitat pagesa e ludica, qu’a de poder èster compartida damb era preséncia der os, per tant, s’existís un exemplar que met en risc aguesta convivéncia s’an de préner es mesures oportunes entà garantir era pervivéncia d’aguesti objectius.

En aguest sens cau arrebrembar qu’eth passat 7 de junh eth sindic d’Aran, Carlos Barrera, eth conselhèr d’Agricultura, Ramaderia e Miei Naturau d’Aran, Jose Enrique Arró e eth conselhèr de Territòri d’Aran, Jose Antonio Boya, s’amassèren en Barcelona damb eth secretari generau de Territòri e Sostenibilitat dera Generalitat de Catalonha, Ferran Falcó, e damb eth director generau de Politiques Ambientaus dera Generalitat de Catalonha, Ferran Miralles, entà tractar es atacs d’os que s’an produsit enes prumèrs mesi d’aguest 2018 e eth comportament der os Goiat en particular, atau coma era reiteracion de quauqui atacs que s’an produsit en explotacions pageses pròplèus a nuclèus abitadi dera Val d’Aran e que disposauen de mesures de seguretat (barraments perimetraus e gossets de defensa). Ena reünion s’arribèc ara conclusion que cau aplicar es mesures de besonh entà corregir aguesti comportaments anomals.

D’autra banda, aué tanben s’a celebrat ena sedença administrativa deth Conselh Generau d’Aran ua reünion tecnica de responsables deth Programa Os dera Generalitat de Catalonha e deth pròpri Conselh Generau d’Aran entà méter en comun tota era informacion disponibla sus es atacs e comportament de quauqui exemplars d’ossi ena Val d’Aran (proximitat a nuclèus e atacs ath bestia en finques colindants as poblacions).

Damb tota era informacion requectada e en tot préner coma referéncia ua prepausa de protocòu existent en Estat espanhòu s’acordarà per consensus un document tecnic que fixe es accions qu’an d’aplicar-se en çò que tanh as exemplars conflictius.

Fin finau arrebrembar qu’eth Conselh Generau d’Aran a era responsabilitat deth seguiment e des indemnizacions des atacs d’os e en cap cas pòt decidir de forma unilaterau mesures de captura e translocacion as lòcs d’origina de quinsevolh exemplar considerat que sigue conflictiu, pr’amor qu’aguesta decision s’a d’acordar per consensus damb totes es parts implicades e a d’èster activada pera Generalitat de Catalonha.