Eth Plen deth Conselh Generau d’Aran apròve es pressupòsti de 2016

Vielha, 20 de junh de 2016.- Eth Plen deth Conselh Generau d’Aran a aprovat aué per 7 vòts en favor de CDA e era abstencion d’UA-PSC e deth PRAG eth pressupòst iniciau corresponent ar an 2016 per un impòrt de 27.106.976 €.

Es pressupòsti aprovadi aué, includissen un increment de 500.000 € entath Servici Aranés de Benéster e Salut (SABS), e ua partida de 400.000 € destinada ath pagament deth 75% que demoraue pendent dera paga extra deth personau deth Conselh Generau d’Aran der an 2012.

IMG_6533

Eth sindic d’Aran, Carlos Barrera, expliquèc que “damb aguest pressupòst, eth Conselh Generau d’Aran da cobertura a totes es responsabilitats aquerides peth traspàs de competéncies, en tot prestar toti es servicis qu’enquia ara a prestat as ciutadans”. Barrera, a ahijut que “çò mès important de tot ei qu’eth Govèrn d’Aran, pogue garantir era prestacion de toti es servicis deth Conselh Generau d’Aran damb era madeisha qualitat que se hec er an 2015, e poder trèir endauant projèctes coma eth dera naua Residéncia Geriatrica dera Val d’Aran, e negociar damb era Generalitat de Catalonha entre 20 e 25 places consorciades en aguest projècte de legislatura”. En çò que pertòque ath prumèr objectiu deth Govèrn d’Aran didec Barrera, “ei trabalhar pera prestacion des servicis de Sanitat e benèster des persones, sense deishar de costat toti es auti airaus coma eth torisme, es infrastructures, era cultura o es emergéncies, que mos mantien coma destinacion toristica de qualitat e permeten melhorar era economia deth país”.

Ena session d’aué, eth Plen deth Conselh Generau d’Aran, a aprovat per unanimitat ua mocion de supòrt ara ramaderia de montanha e ath agropastoralisme, deuant era constatacion deth malestar entre es ramadèrs de nauta montanha, pera reintroduccion d’un nau ós mascle en Pirenèu catalan.

Eth Plen deth Conselh Generau, a aprovat demanar ath departament d’Agricultura, Ramaderia, Pesca e Alimentacion dera Generalitat de Catalonha, ath Ministèri d’Agricultura, Alimentacion e Miei ambient (MAGRAMA) e as institucions europèes, que refortilhen es politiques de supòrt as explotacions pageses de nauta montanha e que modifiquen era actuau PAC en favor d’un major supòrt as activitats agropastoraus, entà establir mesures qu’eviten era sua desaparicion.

Tanben s’a acordat demanar era delimitacion der espaci denominat “Espai Ós”, a on se poguen aplicar mesures especifiques de supòrt ara ramaderia extensiua de montanha, atau coma era realizacion d’un estudi entà determinar eth nombre d’exemplars d’ós que pòt suportar eth Pirenèu, sense méter en risc era seguretat des persones e era contunhitat deth sector ramadèr. Tanben se sollicite ara Generalitat de Catalonha, que se faciliten es tramits administratius entà agilizar es indemnizacions per atacs de fauna sauvatja en Pirenèu catalan, en tot crear ua Taula Tecnica damb representants deth sector ramadèr, que revise es expedients d’atacs de fauna sauvatja protegida.

Comments are closed.