Eth president d’Euroloppet a coneishut de prumèra man es installacions de Baqueira Beret qu’acuelheràn eth campionat europèu de longa distància eth 2016

Eth president d’Euroloppet, Andreas Adam, a visitat era Val d’Aran e s’a amassat damb es organizadors dera Marxa Beret. Era recepcion deth president d’Euroloppet a anat a cargue deth director corporatiu dera Marxa e vicesindic d’Aran, Luís Carlos Medina, deth conselhèr d’Espòrts d’Aran, Marcos Viló, e deth coordinador dera organizacion, Manu Caseny.

Andreas Adam, a coneishut personalaments a ua ampla representacion dera equipa umana que hè possibla era Marxa Beret. Adam a destacat “er excepcionau païsatge qu’aufrís eth Plan de Beret e eth magnific trabalh de toti es que hèn possible era Marxa Beret” e a hijut “Euroloppet tend era man ara Marxa Beret peth qu’age de besonh”.

Era Marxa Beret, que se realizarà eth 1 de hereuèr de 2015, ei era mès importanta der Estat en esquí de hons includit eth Pirenèu Francés, e enguan arribe damb eth guardar metut en europèu de longa distància.

Era carrèra aranesa ei puntuable FIS e ei laguens deth calendari Euroloppet qu’amasse es marches populares d’esquí de hons mès importants d’Euròpa.

En paraules deth vicesindic d’Aran e director dera Marxa Beret, Luís Carlos Medina “era eleccion dera Val d’Aran e mès concrètaments de Beret coma organizadors deth Campionat d’Euròpa de Longa Distància der an 2016, coïncidís pleaments damb es plans deth Govèrn d’Aran de plaçar era Val d’Aran en contèxt europèu d’eveniments esportius de naut valor”.

Era Marxa Beret ei promoiguda peth Conselh Generau d’Aran, Baqueira Beret e er Ajuntament de Naut Aran e compde damb era collaboracion des Volentaris Val d’Aran e d’auti organismes e entitats ath delà dera Reau Federacion Espanhòla d’Espòrts d’Iuèrn e dera Federacion Catalana d’Espòrts d’Iuèrn.